Türkiye prezidenti Recep Tayyip Erdoğan Kyivde brifing vaqtında Ukraina topraq bütünligini ve suverenitetini, şu cümleden işğal etilgen Qırımnı da, desteklegenini tekrarladı.
"Ukraina topraq bütünligini ve suvereniteini, şu cümleden Qırımnı da, desteklemege devam etkenimizni tekrarlamağa isteyim", - dedi o.
Erdoğan, Zelenskıy ile qırımtatarlarnıñ destegi ile bağlı meselelerni ve leyhalarnı muzakere etkenini qayd etti.
Ukraina devlet başı Volodımır Zelenskıy Erdoğanğa destek ve Türkiyeniñ "Qırım platforması"nda faal iştiragi içün minnetdarlıq bildirdi.
Zelenskıy, Türkiye qırımtatarlarnı ve Qırımdan köçip kelgenler içün evlerniñ quruluv meselesini desteklegenini qayd etti.
"Bu işte kerçekten ilerilev bar. Eminmiz ki, tezden neticeler de olur", - dedi Zelenskıy.
Fevralnıñ 3-nde Türkiye devlet başı Ukrainağa resmiy ziyaretnen keldi.
Ukraina Mudafaa naziri Oleysiy Reznikov, fevralniñ 3-nde Türkiyeden delegatsiyanıñ Ukrainağa ziyareti çerçivesinde memleketler arasında, hususan da Ukrainada Bayrktar pilotsız uçaqlarınıñ istisalı içün zavodnıñ quruluvını közde tutqan çerçive añlaşması imzalanacağını bildirdi.
