Türkiye prezidenti Recep Tayyip Erdoğannıñ tarafdarları, soñki malümatqa köre, büyük şeerlerde keçirilgen belediye saylavlarında yuttura, dep haber ete Azatlıq Radiosınıñ rus bürosı.
Erdoğannıñ Adalet ve kalkınma ükümran partisi ğalebe qazandı kibi beyanatına baqmadan, ilk malümatqa köre, o, 2000 seneleriniñ başından berli ilk sefer paytaht Ankarada kontrolni ve Türkiyeniñ eñ büyük şeeri İstanbulda şeer yolbaşçısı vazifesini coya.
İstanbulda reylerni saymağa devam eteler, faqat, saylav komissiyasınıñ ilk malümatına köre, muhalifet Cumhuriyet halk partisiniñ namzeti Ekrem İmamoğlu Erdoğannıñ firqa namzeti, sabıq baş nazir Binali Yıldırımdan 28 biñ rey ile ögde kete.
Ankarada da muhalifet namzeti ğalebe qazandı.
Bir çoq közetici olıp keçken belediye saylavlarını 1994 senesi ile qıyaslana bilgen deñişüv vaqtı dep adlandıra. O vaqıt Erdoğan İstanbulnıñ şeer yolbaşçısı olaraq saylanğan edi, akimiyet yolu da bundan başlandı – 16 yıldan berli o, ya baş nazir, ya prezident vazifesinde qala. Erdoğannıñ özü kampaniyada faal iştirak etip, saylavlarnıñ neticelerini «milliy qaluv» işi dep adlandıra ve muhalifetni çetel memleketleri ve terror birleşmeleri ile alâqaları bar olğanında qabaatlay.
Digerleri ise memleket boyunca Adalet ve kalkınma partisi reylerniñ çoqusını, tahminen 45%-ını qazanıp, belediyelerniñ büyük qısmını kontrol ete. Erdoğan büyük şeerlerde ğalip çıqamağanlarına baqmadan, onıñ firqası «Türkiyeni tiz üstüne oturtaljaqlarğa darbe endirdi», dedi.
Türkiyeniñ cenübi-şarqındaki kürt rayonlarında kürtlerge qoltutqan Halkların Demokratik Partisi ğalebe qazanıp, eki yıl evelsi ğayıp etken yerlerni qaytardı. O vaqıt akimiyet firqanıñ bir çoq vekili terror teşkilâtlarına qoltuta dep, olarnı mandatsız qaldırğan edi.
