Ukraina prezidenti Volodımır Zelenskıy aprelniñ 10-nda Türkiyede iş ziyaretinen bulunıp, Türkiye prezidenti Recep Tayyip Erdoğan ile körüşecek. Zelenskıynıñ matbuat hızmeti bildirgenine köre, ziyaret vaqtında eki taraflı vesiqalarnıñ imzalanması beklenile.
Berilgen malümatqa köre, eki devlet prezidentleriniñ reisligi altında Ukraina ve Rusiye arasında yüksek seviyeli strategik şuranıñ doquzıncı toplaşuvı ötkerilecek.
Türkiye prezidenti Recep Tayyip Erdoğannıñ resmiy saytında Ukraina prezidentinen keçirilecek körüşüv aqqında haber etile.
Bu malümatqa köre, Erdoğan Zelenskıynen «barışıq ve stabillikni saqlav esasında regional ve halqara meselelerniñ çezilüvini» ve qırımtatarlarnıñ yaşayış şaraitlerini eyileştirüvnen bağlı leyhalarnı muzakere etmege niyetlene.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
