Türkiye prezidenti Recep Rayyip Erdoğan dekabrniñ 10-nda ABD prezidenti Donald Trump ve Rusiye prezidenti Vladimir Putin begengen dünya liderleri ola, dep ayttı. Bu aqta Azatlıq Radiosı haber ete.
Aynı vaqıtta Erdoğan, Ankaradaki Bilkent universitetiniñ studentleri ögünde çıqışta bulunıp, Avropada «şimdi ciddiy manada bir lider buhranı, boşluğı bar», dep ayttı.
«Begenseñiz de, begenmeseñiz de, Trump – müim bir ad. Gizli kün tertibi yoq. Maña qarşı da çoq açıq ve tam laf ete», – dedi Erdoğan ve Trumpqa qarşı da aynısını yapqanını qayd etti.
O, Putin de Türkiyeden bir şey gizlemegen ve açıq bir lider ola, dep ayttı.
Erdoğan begengen üçünci lideri – Qatar şeyhi Tamim bin Hamad Al Tanidir. Türkiye prezidenti onı fuqare memleketlerge qoltutqan «genç ve faal» lider dep adlandırdı.
Keçmişteki liderler arasında Erdoğan Hazreti Muhammedni ve zemaneviy Türkiyeniñ qurucısı Mustafa Kemal Atatürkni qayd etti. O, sabıq Almaniya kantsleri Gerhard Şrederni ve sabıq İtaliya baş naziri Silvio Berluskonini de ayttı.
Noyabrniñ 13-nde ABD prezidenti Donald Trump Beyaz Sarayda Erdoğannen keçirgen «mükemmel körüşüvi» aqqında bildirdi. O, Türkiyeniñ Rusiyeden satın alğan S-400 uçaqquvar-raketa kompleksleri «ciddiy çağıruv» ola dep, olarnı al etmege mümkün olğanına ümüt etkenini bildirdi.
