Link açıqlığı

Saatnıñ esas haberi

Erdoğan, Türkiye Tış işler nazirligine ukrain askerleriniñ azat etilmesi meselesini bütün platformalarda kötermege avale etti – Cemilev


Mustafa Cemilev ve Recep Tayyip Erdoğan
Mustafa Cemilev ve Recep Tayyip Erdoğan

Türkiye prezidenti Recep Tayyip Erdoğan Türkiye Tış işler nazirine gemilerniñ Keriç boğazından keçmesi ve Rusiye tarafından zapt etilgen ukrain arbiy gemileriniñ keri qaytarılması meselesini bütün platformalarda kötermege vazife berdi. Bu aqta Türkiye Tış işler naziri Mevlüt Çavuşoğlu qırımtatar halqınıñ lideri Mustafa Cemilevge bildirdi, dep ayttı «Ukrinform» haber agentligine Cemilev.

Haber etilgenine köre, Çavuşoğlu Cemilevge «Putin bu meseleni çezmege ve deñizcilerni saylavlardan evel azat etmege istemey» kibi körüne, dedi.

«O, (Putin – QA) bu adımnı Ukrainada olacaq saylavlarğa «bahşış» olaraq köre. Saylavlarımızğa tesir etmek içün vaziyetni alet olaraq qullanacaq ola. Bu tek uquqqa degil, ahlâqqa da zıt kele. İnsanlarnı siyasiy maqsadlarda qullanmaq – reinelik sistemasıdır», – dep qayd etti Cemilev.

Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».

Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.

Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG