Türkiye prezidenti Recep Tayyip Erdoğan oktâbr ayında Rusiyeni ziyaret ete bile, dep ayttı Kremlniñ matbuat kâtibi Dmitriy Peskov.
Rusiye prezidenti Vladimir Putinniñ matbuat kâtibi aydınlatqan malümatnı Rusiye devlet haber agentlikleri derc ete, dep haber ete Azatlıq Radiosı.
Türkiye prezidentiniñ ofisi planlaştırılğan ziyaret aqqında bildirmey.
Tünevin Kreml oktâbrniñ 15-nde Erdoğan ile telefon subetinde Putin onı eñ yaqın vaqıtta Rusiyege davet etti, ve Türkiye prezidenti davetini qabul etti, dep qayd etti.
Berilgen malümatqa köre, telefon subeti vaqtında Türkiyeniñ Suriye şimali-şarqında oktâbrniñ 9-nda başlatqan tedbirleri laf etildi.
Kremlniñ bildirgenine köre, subet vaqtında Putin Türkiye-Suriye sıñırındaki gumanitar vaziyetni şikâyet etip, Türkiye ve Suriye ükümet quvetleri arasında çatışma olmamalı, dep qayd etti.
ABD prezidenti Donald Trump Türkiye prezidenti Recep Tayyip Erdoğan ile Suriye şimalinde ateş toqtatılması aqqında añlaşmaq içün prezident muavini, devlet kâtibi ve milliy telükesizlik meseleleri mesleatçısını Ankarağa yolladı.
Türkiye prezidenti olarnıñ maqsadı Suriye şimalinde «kürt aydutları» ve «İslâm devleti» gruppirovkasınıñ azalarından boşaltılacaq «telükesizlik alanını» meydanğa ketirmek ola, dep bildirdi. Ankara kürt cenkçilerni «terrorist» dep saya.
Bundan evel ABD küçleri Suriyeniñ Türkiye ile sıñırındaki rayonlardan ordularnı çıqarmağa başladı. Bundan bir qaç saat ögüne Washington Türkiyeniñ Suriye şimali-şarqında kürt quvetlerine qarşı tedbirlerden çette qalacaq, dep ilân etken edi.
