Halqara ana tili kününde, fevralniñ 21-nde, er yıl keçirilgen altıncı qırımtatar online-diktantı keçirilecek, metnini Rusiye apishanesinde tutulğan qırımlı faal, ''Avdet'' qırımtatar gazetiniñ jurnalisti Asan Ahtemov yazdı.
Bu aqta ''Nefes'' cemaat teşebbüsi Facebook saifesinde haber etti.
''Diktant fevralniñ 21-nde Qırım vaqtı ile saat 19:00-da Nefesniñ YouTube kanalında ve Facebook saifesinde canlı yayında oqulacaq'', – dep yazıla ''Nefes'' cemaat teşebbüsiniñ haberinde.
2022 senesi sentâbrniñ 21-nde Rusiyeniñ nezareti altında olğan Qırım Yuqarı mahkemesi Perevalnoye köyünde gaz borusında diversiya davası boyunca üküm çıqardı. Asan Ahtemov 15 yıl sert rejimli koloniyada qalmasına üküm etildi, 500 biñ ruble para cezasını aldı ve 1 yıl azatlıqtan marum etildi. Keçken sene oktâbrniñ soñunda Asan Ahtemov Vladimir vilâyetindeki "Vladimirskiy tsentral" olaraq belli olğan apishanege avuştırılğanı aqqında haber etilgen edi.
Keçken sene er yıllıq qırımtatar tilinde onlayn-diktantn içün metinni Qırımtatar Milliy Meclisi reisiniñ birinci muavini Nariman Celâl yazdı, o da Rusiye apishanesinde buluna.
2022 senesi sentâbrniñ 21-nde Rusiyeniñ nezareti altında olğan Qırım Yuqarı mahkemesi Nariman Celâlnı de Perevalnıyde "gaz borusında diversiya aqqında dava" boyunca 17 yıl sert rejimli koloniyada qalmasına üküm etti, 1,5 yıl azatlıq sıñırlaması ile 700 biñ ruble para cezası berdi. Keçken sene noyabrniñ soñunda Celâl Qırımdan Rusiyeniñ Krasnoyarsk vilâyetindeki Minusinskiy apishanesine avuştırılğanı belli oldı.
İşğal etilgen Qırımnıñ Rusiye akimiyeti umumtasil mekteplerinde qırımtatar ve ukrayin tilleri dersleriniñ sayısını azlaştırdı. Qırımtatar Milliy Meclisiniñ vekilleri, akimiyet qırımtatarlarnı mekteplerde ana tilini ögrenmek imkânından marum ete, dep bildirgen edi.
Aynı zamanda, Qırım yarımadasında ilhaqtan soñ qabul etilgen "Qırım Cumhuriyeti Anayasasınıñ" 10-uncı maddesi qırımtatar, ukrayin ve rus tillerine devlet statusını bere.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
