Milliy telükesizlik ve mudafaa şurasınıñ kâtibi Oleksiy Danılov bildirdi ki, Qırımda tirenüv yarımadadan soñki Rusiye askeri çıqarılğanına qadar devam etecek. Onıñ muracaatı İşğalge qarşı tirenüv Kününe bağışlana.
Danılovnıñ aytqanına köre, Qırım oğrunda uruş bütün Ukraiyn mustaqillik cenkiniñ merkeziy uruşlarından biridir.
''Er şey Qırımdan başladı, Qırımnen bitecek... 2014 senesi fevral 26-da olıp keçken vaqialar Ukrayina tarihında müim bir vaqia oldı ve ukrayin Qırımı iç bir vaqıt teslim olmaycağını ve boyun egmeycegini isbatladı, o, daima qarşılıq kösterecek. Ve bu qarşılıq, soñki rusiyeli işğalci Ukrayina toprağından, şu cümleden Qırımdan quvılmağanına qadar devam etecek'', - dep qayd etti o.
Ukrayina istihbaratınıñ başı Kırılo Budanov Qırımdaki Rusiye quvetleri içün "yañı sürprizler" aqqında ilân etti ve vatandaşlarğa Keriç köpründen faydalanmamağa tevsiye etti.
Fevralniñ 26-nda cemaatçılıq tarafından teşebbüs etilgen Qırımnıñ Rusiye işğaline qarşı tirenüv künü qayd etile. Bu künü Ukrayinada ve bütün dünyada qırımlılarğa ve memleketniñ topraq bütünligine qoltutuv aktsiyaları, munaqaşalar, forumlar, mitingler, yürüşler keçirile.
2014 senesi fevral 26-da QMC Yuqarı Radasınıñ binası ögünde Ukrayinanıñ topraq bütünligine qoltutuv mitingi olıp keçti. O vaqıt miting iştirakçilerine Rusiye tarafdarları, şu cümleden "Rusiye birligi" firqasından olğan faaller qarşılıq köstergen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
