Er-Riyaddaki körüşüvde Ukrayina ve Amerika taqımları ateş toqtatıluvına dair tehnik mesleatlar devam ettirdi, topraq uzlaşuvları muzakere etilmedi, dep bildirdi Ukrayina prezidenti ofisiniñ reber muavini Pavlo Palisa.
«ABD ile beraber beyanatnıñ derc etilmesinden itibaren işke tüşürilecek energetika obyektleri ve Qara deñizde ateş toqtatıluvında añlaşıldı. Rusiyeliler vaqıt sozıp, qoşma şartlar qoyacaq, dep Amerika taqımını tenbilegen edik. Bu daa bir kere ukrayinalılarnıñ kerçek ve adaletli barışıqqa ıntılğanını isbatlay», – dep yazdı o, Facebookta.
Palisa qayd etkenine köre, Kyiv ateşniñ teñ toqtatılmasını istey – ve añlaşmalar bozulsa, tez cevap berecek.
«Qırmızı çizgiler» aqqında: topraq uzlaşuvları aqqında bir laf olmadı. Bu episi Ukrayina toprağı, küreştik ve er türlü vaziyette küreşecekmiz. Ateş toqtatıluvını kontrol etüv mehanizmleri üzerinde işni ve semereli telükesizlik kefaletlerini almaq içün çalışamız, çünki duşman tarafına işançımız yoq», – dedi o.
Martnıñ 23-25-nde Er-Riyadda ABD vekilleri tehnik seviyede Ukrayina eyyetinen eki taraflama muzakereler keçirdik.
Martnıñ 24-nde Er-Riyadda ABD eyyeti Rusiye vekillerinen 12 saat devam etken muzakere keçirdi.
Martnıñ 25-nde Beyaz saray Saudiy Arabistanda Ukrayinanen Qara deñizde telükesiz gemi areketi aqqında ve energetika obyektlerine qarşı darbe yasağınıñ «mehanizmini azırlamağa» añlaşıldı, dep bildirdi.
ABD prezidenti Donald Trump Saudiy Arabistandaki muzakerelerni izaatlap, «büyük ilerilev» aqqında ayttı.
Kreml muzakere neticelerinen bağlı beyanatını derc etip, Rusiye ve ABD 2025 senesi martnıñ 18-nden başlap 30 künge Rusiye ve Ukrayina energetika obyektlerine qarşı darbe yasağı tedbirlerini azırlamağa razı olğanlar. Washingtonnıñ beyanatında tam künler aytılmadı.
Bundan ğayrı, Moskva Qara deñizde telükesiz gemi areketini teminlev añlaşması Rusiyege qarşı bir sıra sanktsiya lâğu etilgen soñ işke tüşürile, dep bildirdi. Washington yapqan beyanatında böyle bir şart aqqında aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
