Saudiy Arabistannıñ paytahtı Er-Riyadda ABD ve Rusiye eyyetleriniñ muzakereleri yekünlendi. Kyiv vaqtınen saat 9:30-da başlağan munaqaşa tahminen dört buçuq saat devam etti, dep bildire agentlik adise yerinden.
Rusiye prezidenti Vladimir Putinniñ yardımcısı Yuriy Uşakov «muzakereler bir qarar keçti», ve taraflar «bir-biriniñ menfaatlarına emiyet bermege añlaştı», dep ayttı.
Rusiye ve ABD prezidentleri Vladimir Putin ve Donald Trumpnıñ körüşüv künü daa belgilenmedi, amma kelecek afta olmaycaqtır.
«Eki memleket eyyetleriniñ işi büyük olmalı. Biz buña azırmız, amma eki liderniñ körüşüv künü aqqında aytmaq şimdilik zor», – dep qayd etti Uşakov Rusiyeniñ «Pervıy kanal» yayınında.
Eyyetlerniñ başlarında tış müessise yolbaşçıları bar – ABD devlet kâtibi Marco Rubio ve Rusiye Tış işler naziri Sergey Lavrov. Amerika eyyetinde milliy telükesizlik mesleatçısı Michael Waltz ve prezidentniñ mahsus elçisi Steven Witkoff. Rusiye eyyetinde – prezident Vladimir Putinniñ yardımcısı Yuriy Uşakov ve Rusiye doğru yatırımlar fondunıñ yolbaşçısı Kirill Dmitriyev.
Putinge yaqın olğan finansçı olaraq sayılğan Dmitriyev CNN telekompaniyasına bergen intervyüsında ABD prezidenti Donald Trumpnıñ bazı taqım azalarınen endi körüşken edi, dep ayttı, amma ne vaqıt ve qayda olğanını aytmadı. Dmitriyev qayd etkenine köre, «prezident Donald Trump dünyada pek çoq meseleni pek faal çeze», ve «müsbet bir munaqaşağa» ve ABD ve Rusiye munasebetlerini eyileşecek, dep ümüt etkenini bildirdi. Onıñ qayd etkenine köre, Rusiyege qarşı sanktsiyalarnıñ lâğu etilüvi Rusiye içün degil de, ABD içün daa müimdir, çünki olar Moskvağa qarşı iqtisadiy tedbirler neticesinde 300 milliard dollarnı coyğan eken.
Muzakereler keçirilgen yerde jurnalistler toplaştı, telükesizlik tedbirleri quvetleştirildi.
ABD vekilleri «başlanğıç bağları» aqqında aytıla, dep bildirdi, maqsadı ise Rusiyeniñ Ukrayinağa qarşı cenk bitirüv imkânlarında niyetleriniñ ciddiy olıp olmağanını añlamaq ola. Kreml biraz farqlı baqıp, muzakerelerde «Rusiye-Amerika munasebetleri» aqqında aytılacaq, dep bildire.
Ukrayina prezidenti Volodımır Zelenskıy evelden qayd etti ki, o, davet etilse edi, körüşüvge kelmez edi, çünki Ukrayina azırlıqlarda iştirak etmedi. Onıñ aytqanına köre, Ukrayina ABD ve Rusiye arasında öz taqdiri aqqında yapılğan iç bir añlaşmanı iştiraksiz qabul etmeycek. AB de bu fikirde. ABD prezidentiniñ mahsus elçisi Kit Kellog bir kün evelsi işandırdı ki, Ukrayina aqqında iç bir qarar onsız qabul etilmeycek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
