Rusiyeniñ Ukrayinağa qarşı başlatqan cenkte er kün 60-100 Ukrayina arbiyi öle, daa 500 yaralana. Bunı mayısnıñ 31-nde Ukrayina prezidenti Volodımır Zelenskıy Newsmax telekanalına intervyü vaqtında bildirdi.
"Vaziyet pek zor, künde 60-100 asker öle ve 500-ge yaqın yaralana. Mudafaa sıñırlarımıznı böyle qorçalaymız", - dedi o.
O, Ukrayinanı "küçlü mudafaa perimetri" adlandırdırıp, eñ qıyın vaziyet Ukrayinanıñ şarqında olğağanını qayd etti.
Rusiyeniñ keniş mıqyaslı istilâsı başlanğandan berli Ukrayina akimiyeti Ukrayina Silâlı Quvetleriniñ sıralarından umumiy ve künlük ğayıplarğa dair malümat bermey.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
