Ukraina tarafı, «er kesni er keske» formatında olacaq deñişimniñ birinci etapı çerçivesinde işğal etilgen Donetsk ve Lugansk vilâyetlerinde bulunğan 77 ukrainalınıñ qaytmasını bekley. Bu aqta Üç taraflı bağ gruppasınıñ gumanitar alt gruppasındaki Ukraina vekili Valeriya Lutkovskaya haber etti, dep bildire Azatlıq Radiosı UNIAN agentligine esaslanıp.
«77 insan – bugünki künde qaytarmamız mümkün olğan insanlarnıñ sayısı. Bu Donetsk (53 kişi) ve Lugansk tarafından (24 kişi) tasdıqlanğan şahıslardır», – dedi Lutkovskaya.
Onıñ aytqanına köre, deñişim cedvellerini keliştirüv esnası devam ete.
«Birinci adım (deñişimniñ – QA) – tasdıqlanğanlarnı almaşuv, ekinci adım ise – qıdırılğanlarnı deñişim, çünki anda olğan insanlarnı bilemiz, apiste olğanlarını tasdıqlağan vesiqalarımız bar, amma muzakerelerde olarnı daa tasdıqlamadılar», – dedi Lutkovskaya.
Deñişim meselesi dekabrniñ 18-nde keçirilecek, o künü Minskte Üç taraflı bağ gruppasınıñ nevbetteki toplaşuvı olmaq kerek.
Parijde dekabrniñ 9-nda aqşam Ukraina, Rusiye, Frenkistan ve Almaniya liderleriniñ körüşüvi olıp keçti. Ukraina prezidenti Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin ile eki taraflı körüşüvler keçirdi.
Ukraina prezidenti Volodımır Zelenskıynıñ bildirgenine köre, «Normandiya formatındaki» muzakerelerde Ukraina ve Rusiyede tutulğan şahıslarnı «er kesni er keske» şeklinde deñişim aqqında añlaştılar. Onıñ aytqanına köre, bu esnaf bir kaç etaptan ibaret olacaq.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
