Ukrayina akimiyeti bugünde Rusiyede ya da onıñ işğal etken bölgelerde qanunsız şekilde tutulğan siyasiy mabüslerniñ episini azat etmek içün elinden kelgen er şeyni yapa. Bunı Ukrayina Yuqarı Radasınıñ yolbaşçısı Ruslan Stefançuk oktâbrniñ 24-nde Azatlıq Radiosına izaat berir eken bildirdi.
"Ukraiyna içün insannıñ ayatı ve sağlığı eñ yüksek degerdir. Ve bugün esirlikte olğan arbiymi adiy vatandaşmı, er bir ukrayinalınıñ tezden azat etilmesi içün Ukrayina devlet başınıñ, arbiylerniñ, mahsus hızmetlerniñ ne qadar çoq yapqanını köresiñiz. Eminim ki, adamlarımıznı arbiy ya da arbiy olmağanlarğa ayırmaymız. Er biri ukrayinalıdır. Ve böyle deñişmelerden birinde biz Ukrayinadan qanunsız şekilde alıp çıqarılğan ve qanunsız tutulğan er bir insannı mıtlaqa körecekmiz, dep tüşünem. Bu em qanusız şekilde yaqalanğan ve apis cezasına mahküm etilgen qırımtatarlar, em sürgün etilgen ukrayinalı balalar, em esirlikte olğan ukrayinalı arbiyler. Er biri evine qaytacaq ve biz bunıñ içün er şeyni yapamız", - dep bildirdi o.
Ukrayina prezidentiniñ Qırım MC Daimiy temsilciliginiñ soñki malümatına köre, Rusiye 181 ukrayinalı siyasiy mabüsni qanunsız şekilde tuta. Olarnıñ arasında Qırım.Aqiqat leyhasınıñ jurnalisti Vladislav Yesipenko.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
