Rusiye kontrolindeki Qırımnıñ İçki rayon mahkemesi noyabrniñ 25-nde «çaqmağanında» (qomşu Rusiye Ceza kodeksiniñ 205.6 maddesi) qabaatlanğan Enver Topçiniñ davasını temelden baqıp başladı. Oturışuv çoq devam etmedi, terciman olmağanı içün dekabr ayına qadar teneffüs ilân etildi, dep bildire Qırım.Aqiqat mühbiri.
«Bugün bizni mahkeme oturışuv salonına kirsetmediler, pek küçük salon berildi. Oturışuvnı başlatıp, qadı anket malümatlarını soradı, Enver Topçi Ukraina vatandaşı olğanını qayd etti. Soñra qadı muracaatlarımız barmı dep soradı – men diñleyici ve matbuat vekilleriniñ kirsetilmesini istedim. Qabaatlav salonğa matbuat vekilleriniñ kirsetilüvine qarşı çıqtı, amma diñleyicilerniñ kirmesine qarşı degil edi, faqat mahkeme epidemiologik tedbirlerge esaslanıp razı olmadı. Biz bütün tedbirlerge riayet etip, mesafeni qorup ve qoruv vastalarını qullanıp, diñleyicilerni almaq mümkün dep qayd ettik, faqat mahkeme, tekrarlayım, hastalanuv telükesine esaslandı», – dedi advokat Emil Kurbedinov.
Advokatnıñ aytqanına köre, mahkeme qırımtatar tili tercimanı esnasta iştiraetsin ep oturışuvnı başqa künge qaldırdı.
«Bu eki muracaat baqılğan soñ, qadı tahqiqat vaqtında Enver Topçiniñ qırımtatar tili tercimanı bar olğanını apansızdan hatırlattı. Mahkemede Enver esnasta tercimannıñ iştirak etmesi kerek olğanını tasdıqladı ve mahkeme tercimannı ketirmegeni içün oturışuv dekabrniñ 8-ne qaldırıldı», – dedi advokat.
Mahkeme binası ögünde toplaşqan vatandaşlarnı videoğa çıqarğan Rusiye quvet qurulışlarınıñ hadimleri tura edi.
«Mahkemeden çıqqanda ekstremizm ile küreş merkeziniñ 6 operativ hadimini ve 3 politsiya hadimini kördim, olar mahkeme yanında toplaşqan insanlarnı videoğa çıqardı. Kim olğanlarını soradım. Telükesizlik olsun dep çıqaralar degenler, birisi İç işler nazirliginiñ hadimi şeadetnamesini kösterdi ve video çıqarmağa devam etkenler», – dedi Kurbedinov.
Advokat emin ki, mahkeme ögünde alınğan malümatnı quvetçiler «faallerge qarşı basqı yapmaq içün» qullanacaqlar.
Avgustnıñ 31-nde Rusiye quvetçileri Sudaq, İçki ve Seyitler rayonlarında Enver Topçi, Ayder Ablâkimov, Ridvan Umerov ve Ayder Kadırovnıñ evinde tintüv keçirdi.
Dört qırımlığa qarşı Rusiye Ceza kodeksiniñ 205.6 maddesine istinaden (cinayet aqqında haber etmeme) dava açıldı. Oña köre 100 biñ rublege qadar para cezası, 1 yılğa qadar mecburiy işler ya da aynı müddetke apis cezası berile bile.
Mabüsler uquq qoruyıcı organlarına Umicon Dadajonov ile içtimaiy ağlarda yazışqanını bildirmegeninde qabaatlana. O, FSB bildirgenine köre, «Rusiyede terror teşkilâtı tanılğan «IŞİD» teşkilâtınıñ faaliyetinde iştirak etken edi».
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
