Rusiye mahkemesi «qırımlı musulmanlar davasınıñ» Bağçasaraylı mabüsi Enver Mamutovnı Rusiyeniñ Stavropol ülkesinden Çuvaş Cumhuriyetiniñ İK-3-ne avuştırdı. Bu aqta ömür arqadaşı Aliye Abselâmova «Qırım birdemligi» cemaat birleşmesine bildirdi.
Ömür arqadaşınıñ ricasınen mayısnıñ 6-nda advokat Mamutovnı ziyaret etmege tırıştı, lâkin onı toplaşuv bar manaçığınen içeri almadılar. O künü qırımlı apayına telefon etip, onı başqa koloniyağa etap eteler, dep bildirdi.
Advokat Enver Mamutovnen etaptan evel körüşip oldı. O, qırımtatarı avuştırılğanını tasdıqladı, lâkin etap sebebi ve soñki yeri belli degil edi.
Aliye Abselâmovanıñ aqayı bir qaç kere telefon etti: mayısnıñ 20-nde Volgograddan, mayısnıñ 24-nde Tataristandan ve iyünniñ 6-nda Çuvaşiyadan. İyünniñ 13-nde Enver Mamutov qorantasında Çuvaş Cumhuriyetiniñ Rusiyeniñ Cezalarnı yerine ketirüv federal hızmetindeki İK-3-te karantin müddeti bitti, dep bildirdi.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi. Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
İyülniñ 11-nde Rusiye Yuqarı mahkemesi dava mabüsleriniñ ükmüni deñiştirdi. Enver Mamutovğa 16 yıl ve 9 ay apis cezası berildi, Remzi Memetov, Rustem Abiltarov, Zevri Abseitovğa – 8 yıl ve 9 ay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
