Enver beş buçuq yıl içinde ilk sefer qorantasınen uzun körüşti. Galina aytqanına köre, aqayı 15 kilogramm azdı. Yeletske kelgen soñ yapılğan talilleri B gepatiti ağırlaşqanını kösterdi.
«Bir müddet keçken soñ telefonda «Silibinin» (hronik ciger hastalıqlarında berilgen ilâc – QA) ilâcı berilgenini ayttı. İlâclardan soñ oña kene taliller yapılacaq edi, amma öyle de olmadı. Onı körüşüvde körgende köz aqları patlağan damarlarınen sarı tüste edi», – dep tarif etti Galina Şevçuk.
Onıñ qayd etkenine köre, Enver apiske alınğanda, daa Novoçerkassk SİZOsında, aşqazanı tutıp başladı. Ap yardım etmegeni içün ineler yapıldı. Tiş ve köz problemleri ağırlaştı. Qırımlı faal kamerada dım olğanını tarif etti.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
2022 senesi noyabrniñ 24-nde Rostov-na-Donudaki Cenübiy arbiy okrugınıñ mahkemesi mabüslerni terror faaliyetinde ve akimiyet zapt etmege tırışqanlarında qabaatladı. Faaller Enver Ametov ve Yaşar Muyedinov 13 yıl sert rejimli koloniyada, vatandaş jurnalistleri Ruslan Suleymanov, Rustem Şeyhaliyev ve Osman Arifmemetov 14 yıl koloniyada qalmasına üküm etildi. Mabüsler 4 yılnı apishanede keçirecek, soñra daa 1 yılğa areket serbestligi sıñırlanacaq. Mabüsler özüni qabaatlı olaraq tanımayıp, siyasiy taqip olğanını tüşüneler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
