Eñ az 193 Ukrayına vatandaşı siyasiy sebeplerden apiste yata. Olarnı Qırım SİZOlarında ya da Rusiyedeki koloniyalarda tutalar, dep bildirdi «Qırım aq qorçalayıcı gruppasınıñ» idare reisi Olğa Skrıpnik.
«2023 senesi Ukrayınağa qaytqan tek eki siyasiy mabüsimiz bar. «Diversantlar davası» boyunca qabatalanğan Andriy Zahtey ve Aqyarda Taras Şevçenkonıñ doğğan kününe bağışlanğan Ukrayına aktsiyasında iştirak etkeni içün siyasiy maddelerge istinaden qabaatlanğan Mıkolay Şiptur. Amma olar qanunsız cezanı çekken soñ qaytqanlar. Deñişüv çerçivesinde qaytarılmadılar. Cezasını çekken soñ Rusiye olarnı yiberdi», – dep bildire Skripnikniñ aytqanlarını «Suspilne».
Bundan ğayrı, 2023 senesi siyasiy mabüsler apiste can bergen işğal vaqtında ilk yıl oldı. Bu Konstantin Şiring ve Cemil Gafarov – olar, Skripnik qayd etkenine köre, Rusiye vekili sağlıq vaziyetlerini bilse de, olar kerekli tibbiy yardım alamağanlar.
«Ümüt etem ki, 2024 senesi vatandaş reineleri etrafında ciddiy, küçlü bir koalitsiya qurulacaq bir yıl olur. Ukrayına prezidenti özü qayd etti, bu tam bir barışıq planı. Bu insanlarnı qaytarmaq içün mehanizm azırlamalımız. Bugün qırımlı siyasiy mabüsler ve qırımtatarlar deñişüv cedvellerine alınmay, çünki Rusiye bunı öz toprağı dep köre ve bu cenknen bağlamay. Rusiye bu cedvellerni körmemezlikke urıp, olarnı öz vatandaşları olaraq köre ve ne yapacağına özü qarar bere», – dep ayttı Skripnik.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
