Keniş mıqyaslı cenk başlanğanından berli Rusiye Ukrayinanı açıq şekilde desteklegen qırımlılarğa tazyıqnı arttırğan – eñ az 15 qırımlı jurnalist RF taqipleriniñ qurbanı olğan. Bunı "Qırım uquq qoruyıcı gruppası" haber etti.
Tedqiqatçı İrina Sedovanıñ sözlerine köre, Rusiye quvetçileri yalıñız cemiyetke belli adamlarnı degil, adiy vatandaşlarnı da öz fikirlerini ifade etkenleri içün tevqif ete.
"Bunıñ içün RF İş yürsetme qanunnamesiniñ Rusiye ordusını itibardan tüşürmege yasaq etken yañı maddesini faal qullanalar. Şimdilik, "keçken sene içinde qırımlılarğa qarşı Rusiye ordusını itibardan tüşürgenleri içün açılğan" eñ az 200 memuriy dava aqqında bellidir", - dedi o.
Onıñ qayd etkeni kibi, adamlarnı soqaqlarda ukrayin türkülerini yırağanları içün para cezasına mahküm ve atta tevqif etip başlağanlar.
"Ukrayinağa şan-şerefler! Qaramanlarğa şan-şerefler!" şiarı içün adamğa 50 biñ ruble para cezası tayin etilgenini qayd ettik. "Oy u luzi çervona kalına" yırı içün ise birden 6 kişige para cezası berildi, birisi atta 15 künge tevqif etildi. Soqaqta Ukrayina gimnini yırlağan bir kişi 13 künge tevqif etildi", -dep qayd etti o.
İşğal etilgen Qırım ve Aqyarda Ukrayina tarafdarı faallerni taqip etmege devam eteler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
