2023 senesi fevralniñ başından eñ az 14 Qırım sakini demiryolda «diversiyalarda» «qabaatlanğanlarnı» qıdıruv sebebinden Rusiye uquq qoruyıcıları tarafından taqip etile. Bu aqta «KrımSOS» aq qorçalayıcı teşkilâtı haber ete.
İşğalciler eñ az 11 tintüv keçirdi ve 10 kişini apiske aldı. «Tutuvlardan birinde qaçıruv alâmetleri bar edi. Uquq qoruyıcılarnıñ bu qanunsız areketleri qırımtatarlarğa qarşı yapıla», – dep qayd ete aq qorçalayıcılar.
2023 senesi mart ayında Rusiye uquq qoruyıcı qurulışları 8 qırımtatarınıñ evini tintti, dep aytıla haberde. Uquq qoruyıcılar saba erte tintüv keçirmege kele ve tahqiqat areketlerini sert bir şekilde keçire. Bazı yerlerde tintüvlerden soñ tutulğanlarnı Aqmescitteki FSB idaresine alıp ketkenler.
İyünniñ 11-nde Qırımnıñ Rusiye yolbaşçısı Sergey Aksenov Qırımnıñ İslâm Terek rayonında demiryol zarar kördi, dep bildirdi. Bir qaç saat devamında trenler areket etmey edi.
Mayısnıñ 18-nde Aqmescit rayonında bir qaç vagon relsten çıqqan edi. «Qırım demiryolları» müessisesi qaza sebebi – «alâqası olmağan şahıslarnıñ demiryol naqliyatınıñ işine kirişüvi» oldı, dep bildirdi. Soñra Qırımnıñ Rusiye akimiyeti demiryolda telükesizlik tedbirleri sertleşecek, dep ilân etti.
Qırımnıñ Rusiye parlamentiniñ spikeri Vladimir Konstantinov adiseni «patlatuv» dep adlandırdı ve Ukrayınanı qabaatladı.
Ukrayına istihbaratı Rusiye arbiyleri bu demiryolnı silâ taşımaq içün qullandı, dep bildirdi. Ukrayına Mudafaa nazirliginiñ Baş istihbarat idaresiniñ spikeri Andriy Yusov «demiryolu dayanamayıp, yoruldı ve vaqtınca çalışmay», dep ayttı.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi, dep haber etildi. Neticede trenlerniñ areketi toqtatıldı.
Rusiyeniñ Ukrayınağa qarşı tam istilâsı başlağanından berli Qırımda yüksek («sarı») terror telükesi seviyesi devam ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
