Rusiye kontrolindeki Qırım ve Aqyar musulmanları diniy idaresiniñ yolbaşçısı Emirali Ablayev Herson vilâyetiniñ sakinlerine Qırım musulmanları ve iş adamlarından 100 tonna «gumanitar yardım» yollamağa niyetlene. O, Hersonnı «Rusiye» şeeri dep adlandırdı.
«2014 senesine qadar andaki musulmanlar bizge ait edi. 2014 senesi bağlarımız resmiy şekilde üzüldi, bir-birimizge barmay edik, amma yahşı bağda edik. Bugün, Herson Rusiyege keçken soñ, yerli musulmanlarğa qasevetlenmesinler dep ayttıq – er şeyde yardım etermiz: diniy meselelerde, kitaplarnen temin etüvde, oquv esnasında. Yarın ne olacağını – tek Allah bile. Bugün elimizden kelgenini yapamız», – dedi Ablayev Rusiyege qoltutqan «Millet» telekanalınıñ yayınında.
Hatırlatamız, Rusiye kontrolindeki Qırım ve Aqyar musulmanları diniy idaresiniñ yolbaşçısınıñ muavini Raim Gafarov akimiyet tarafından keçirilgen qırımtatarlarnıñ «vekiller toplaşuvında» çıqışta bulunıp, Rusiye prezidenti Vladimir Putinge ve Ukrainadaki cenkke qoltuttı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
