Qırımlı aq qorçalayıcı Emir-Usein Kuku Salavattaki Rusiye koloniyasından tez-tez hastahanege alıp kettiler – büyrekleri tuttı. Bu aqta «Qırım birdemligi» cemaat birleşmesi haber ete.
«Resmiy saytlarında üç nomer bar edi, koloniyanen bağlanmağa tırıştım, iç birisi cevap bermey. SSoñra Başqortostan cemaat-közetüv komissiyasına yazdım. Reis Oleg Sergeyeviç tez cevap berdi. O, sanitar bölükniñ reberinen bağlanıp, Emirni ağırnen çıqarğanlar, dedi. Angi hastahanege belli degil – apishane ya da şeer hastahanesine. Büyrekleri tuttı ve taşlar ağırta. Şimdilik hastahanede qalacaq. Soñra qarar alınacaq – tedaviylevinen bağlı», – dep trif etti siyasiy mabüsniñ ömür arqadaşı Meryem Kuku.
2015 senesi aq qorçalayıcı ilk sefer tutulğanda Rusiye uquq qoruyıcıları Kukunı büyreklerine urdı, dep qayd ete «Qırım birdemligi».
«Bu yaralar koloniya şaraitlerinde tedaviylenmey, hronik oldı ve er vaqıt özüni hatırlata. Bunı mektüplerde yazğan edi», – dep aytıla haberde.
Emir-Usein Kuku – qırımtatar aq qorçalayıcısı ve faali. 2019 senesi noyabrniñ 12-nde Rusiyeniñ Cenübiy okrugınıñ arbiy mahkemesi onı «terror teşkilâtınıñ faaliyetini teşkil etkeninde» qabaatlap, 12 yılğa üküm etti. Amnesty International Kukunı vicdan mabüsi dep saya.
«Memorial» aq qorçalayıcı merkezi Emir-Usein Kukunı siyasiy mabüs dep tanıdı. 2020 senesi dekabr ayında onı Levko Lukyanenko Ukraina devlet stipendiyasını alması içün namzet köstergenler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
