Telefonda özüni Rusiye Federatsiyası FSBsiniñ hadimi olaraq tanıtqan kimligi belli olmağan kişi qırımlı Emine Zekeryayevanı hırsızlar, dep qorquzdı. Bu aqta «Qırım birdemligi» cemaat birleşmesi advokatı Emil Kurbedinovnıñ malümatına esaslanıp bildire.
Berilgen malümatqa köre, kimligi belli olmağan erkek sentâbrniñ 5-nde Zekeryayevağa telefon etip, Canköydeki Rusiye Tahqiqat komitetiniñ idaresine kelmesini talap etti. Bunı eki kere yaptı ve adı ve soyadını aytmadı. Amma evde keçirilgen tintüvde bar edi, dep qayd etti. Emine resmiy celpname yollasınlar ve tahqiqatçılarğa advokatnen kelmege istey, dep aytqanda kimligi belli olmağan kişi onı qorquzıp başladı.
«Aysa başqa usullarnen areket etecekmiz. Kelip alacaqmız sizni», – dep bildire telefon etkenniñ aytqanlarını advokat Emil Kurbedinov.
Kurbedinov bildirgenine köre, böyle areketler Rusiye qanunlarını boza dep, Rusiye FSBsine muracaat yolladı. Advokat hadimler bu areketlerde cinaiy ya da memuriy cinayet alâmetleri barmı teşkermeli, dep israr ete.
Avgustnıñ 7-nde saba 30 yaşında Asan Zekeryayevniñ evinde tintüv keçirildi. Bundan soñ erkek belli olmağan yerge alıp ketirildi. Soñra belli olğanına köre, Zekeryayevniñ qorantası Eski Qırımğa ketirildi – yaşağan yerlerinde kene tintüv keçirildi. Evni silâlı insanlar ve zırhlı arabalar sarıp aldı.
Rusiye uquq qoruyıcıları Zekeryayevni ilk sefer tutmay. 2022 senesi yanvar ayında Aqmescitte polis hadimleri oña qarşı qırımlı musulmanlarnıñ davası baqılğan mahkeme binası ögünde olğanı içün protokol tizgen edi. O vaqıt 14 kün memuriy apiste tutuldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
