Ukrayına Tış işler naziriniñ birinci muavini, qırımlı Emine Ceppar Freedom Housenıñ Mark Palmer mukâfatını aldı. Teşkilâtnıñ resmiy saytında berilgen malümatqa köre, mukâfat dekabrniñ 7-nde berilecek.
«Karyerası devamında Rusiye ve sovet akimiyetleriniñ siyasiy taqip ve repressiyalarına oğrağan qırımtatarlarnıñ ve Qırımda Rusiye işğalci quvetleri tarafından qanunsız bir şekilde apiske alınğan ukrayınalı siyasiy mabüs ve jurnalistlerniñ aqlarını faal bir şekilde qorudı. 2022 senesi Rusiye Ukrayınağa istilâ etken soñ o, halqara toplulıqnı Ukrayınağa qoltutıp, Qırım sakinleri, hususan qırımtatarlarnıñ Rusiye silâlı quvetlerine qanunsız alınmasını takbih etmesine çağırdı. O, Rusiye ordusınıñ Ukrayınada yapqan cenk cinayetleri aqqında malümatnı da tahqiq etmege çağırdı», – dep aytıla haberde.
Mark Palmer mukâfatı diplomat ya da halqara teşkilâtlarnıñ vekillerine «millet ve vatandaş cemaatına demokratiya ve insan aqlarını ileriletüvge yardım etmek ve mukâfatlandırmaq içün cesür ve semereli vastalarnı qullanğanları» içün berile.
Rusiye mahkemesi Emine Cepparnı ğıyabiy şekilde apiske alıp, «Rusiye Federatsiyasınıñ topraq bütünligini bozuv» maddesine istinaden qıdıruvğa ilân etti. O, bunı «işiniñ semeriligini tanıma olaraq» qabul ete, dep bildirdi.
Emine Ceppar Keriçte östi. Ceppar Qırım.Aqiqatnıñ jurnalisti olıp çalıştı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
