Bugün Rusiye mahkemesi "RF topraq bütünliginiñ bozulması" maddesi ile ğıyabiy şekilde teqif etken ve halqara qıdıruvğa bergen Ukrayina Tış işler naziriniñ muavini Emine Ceppar "bunı öz işiniñ semeriliginiñ tanılması" kibi sayğanını bildirdi.
"Doğrusı aytqanda, 2014 senesinden, Vatanımnıñ Rusiye tarafından işğaliniñ ilk künlerinden Ukrayinanıñ topraq bütünliginiñ ğayrıdan tiklenilmesi ile oğraşam. Şunıñ içün bu kibi areketlerni öz işimniñ semeriliginiñ tanılması olaraq saya", - dep yazdı o Facebookta.
Ukrayinanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk da Rusiye tarafından halqara qıdıruvğa berilmesine cevap berdi.
"Haber vastalarında RF topraq bütünligini bozğanım içün rusiyeliler meni ğıyabiy tefqif etkeni ve halqara qıdıruvğa bergeni aqqında yazalar. Ne deyim? Bu menim işim", - dep yazdı o Telegramda.
Rusiye Fedaral telükesizilik hızmeti Moskvanıñ Lefortovo mahkemesinden Ukrayina Tış işler naziriniñ birinci muavini Emine Cepparnıñ ve Ukrayinanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuknıñ "RF topraq bütünliginiñ bozulması" maddesi ile ğıyabiy tevqif etilmesini istedi.
Oktâbr ayında Ukrayina yüzlernen rusiyeli memur ve mebusnı qıdıruvğa bergen edi - bular RF Devlet dumasınıñ mebusları, senatorlar, Telükesizlik hızmetiniñ azaları ve Rusiye yolbaşçıları.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
