Ukraina Tış işler naziriniñ birinci muavini Emine Ceppar UNESCO işleri Milliy komissiyasınıñ reisi vazifesine tayin etildi.
Ukraina Tış işler nazirliginiñ saytında berilgen malümatqa köre, Milliy komissiya işğal etilgen Qırımnıñ problemlerine, hususan UNESCO tarafından yarımadada vaziyetniñ monitoringini teşkil etüv meselesine halqara toplulıqnıñ diqqatını celp etmek içün bütün imkânlarnı qullanmağa devam etecek.
«Tasil, ilim, medeniyet, malümat ve bağ kibi UNESCO aletleri ve imkânlarını milliy menfaatlarda qullanuv memleketimizniñ icadiy ve intellektual imkânlarını umumdünya esnaslarına celp etmege yardım etecek», – dep aytıla müessise haberinde.
Berilgen malümatqa köre, qırımtatar örnegi UNESCO mirasınıñ ilk cedveline alındı.
Qırım işğalinden soñ Rusiye Qırımda medeniy ve tarihiy emiyeti olğan bütün obyektlerni öz yurisdiktsiyası altına aldı. Kyiv, olar Ukraina halqına ait olğanını israr etip, mezkür obyektlerni UNESCO imayesi altına almağa rica ete.
2019 senesi sentâbr ayında UNESCO baş müdiri Audrey Azoulaynıñ maruzası aydınlatılğan edi, anda yarımadada vaziyet kerginleşe, dep qayd etile.
Qırımnıñ Rusiye akimiyeti UNESCO maruzalarında berilgen malümatnen razı degil. Qırımnıñ Rusiye medeniyet naziri Arina Novoselskaya UNESCO vekillerini yarımadağa davet etip, medeniy ve tarihiy obyektlerniñ vaziyetine «tarafsız qıymet kesmege» teklif etken edi.
UNESCO Dünya mirası cedveline işğal altındaki Qırımnıñ «Tavrik Hersones» qoruğı kirmekte. Cedvelge kirsetilecek namzetler arasında Bağçasaraydaki Hanlar sarayı, Sudaqtaki Ceneviz qalesi, Qırım astrofizik observatoriyası, Manğup Qale, Eski Kermen ve Çufut Qale bar.
