«Qırımlı musulmanlar davası» boyunca Rusiye tarafından 17 yılğa üküm etilgen qırımlı bala idmancısı Emil Ziyadinov Lipetsk vilâyetiniñ №2 apishanesinden Rusiyeniñ Arhangelsk vilâyetiniñ Korâjma şeerindeki №5 tüzetüv koloniyasına etap etildi. Bu aqta apayı Elviye Ziyadinova «Qırım birdemligine» bildirdi.
Onıñ aytqanına köre, etap eki afta ve eki kün sürdi. Sentâbrniñ 23-nde Ziyadinov apishaneden çıqarıldı ve oktâbrniñ 9-nda «Zonatelekom» vastasınen ömür arqadaşına telefon etip, İK-5-te karantinde olğanını haber etti.
«Korâjmağa kelgeninen tıraş olmağa mecbur etkenler – mecbur eken, Emil qanunğa (iç nizam qaideleri aqqında aytıla – QA) esaslanıp, saqalı 6 mm (9 mm qadar ola bile – QA) ola bile, dep itiraz bildirmege tırıştı. Amma oña yasaq, dep aytqanlar», – dep qayd etti Ziyadinova.
Karantinden çıqqan soñ qırımlı ögrenip, tiküv istisalında çalışmağa istey, dep aytıla haberde.
«Memorial» aq qorçalayıcı merkezi Emil Ziyadinovnı siyasiy mabüs dep tanıdı.
2020 senesi iyülniñ 7-nde Rusiye quvetçileri yedi qırımtatarı, hususan Emil Ziyadinovnıñ Qurman rayonındaki Büyük Onlar qasabasında evini tintti.
Rusiye FSBsi «Qırım sakinleri arasında terror mefküresini tarqatqan, qırımlı musulmanlarnı saflarına celp etken» «Hizb ut-Tahrir» bölügini qurğanından ve iştirak etkeninden şübheli sayılğanlar tutuldı, dep bildirdi.
Rusiye uquq qoruyıcılarınıñ areketlerini Ukrayına prezidentiniñ Qırım Muhtar Cumhuriyetindeki temsilciligi takbih etti, Qırım Muhtar Cumhuriyeti ve Aqyardaki Milliy polisniñ Baş idaresi Ukrayına Ceza kodeksiniñ 162-nci maddesiniñ 2-nci qısmına (mesken tiyilmemezliginiñ bozuluvı) ve 146-ncı maddesiniñ 2-nci qısmına (qanunsız bir şekilde azatlıqtan marum etüv) istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
