«Qırımlı musulmanlar davası» boyunca 17 yılğa azatlıqtan marum etilgen qırımlı bala idmancısı Emil Ziyadinov etap vaqtında aqları bozulğanı içün Lipetsk SİZOsı yolbaşçısınıñ nevbetçi yardımcısınıñ areketlerini şikâyet etti, dep haber ete «Qırım birdemligi» cemaat birleşmesi Ziyadinovnıñ ömür arqadaşı Elviyeniñ malümatına esaslanıp.
«Onı Novoçerkassktan etap etkende Lipetsk SİZOsından tranzitnen kete edi. Olarnı mağazğa qapatqanlar. Yanvar ayı edi. Ne matras, ne yorğan berildi. Suvuqta yuqlağanlar – demir üstünde. Pek üşügenler dep ayttı. Suvuqtan uyanğan ediler», – dep tarif etti Elviye.
Elviyeniñ tarif etkenine köre, Ziyadinov Rusiye prokuraturası, Rusiye Federatsiyasınıñ ombudsmeni Tatyana Moskalkova ve Rusiye Federatsiyasınıñ cemaat-nezaret komissiyasına şikâyet yazdı. Onıñ muracaatını Lipetsk vilâketiniñ Cezalarnı yerine ketirüv federal hızmetiniñ idaresine yollağanlar, soñra «bir bozuv tapılmadı», dep haber etildi.
Daa evel berilgen malümatqa köre, Novoçerkassk SİZOsından 2022 senesi dekabrniñ 26-nda saba Emil Ziyadinov Lenur Seydametovnen (onı da Rusiyede yasaqlanğan «Hizb ut-Tahrir» din teşkilâtı ile alâqalarında qabaatladılar) beraber çıqarıldı. Onı trennen Voronej izolâtorına ketirgenler, bir künden soñ ise Lipetskke yollağanlar.
Anda olarnı mahsus blokqa yerleştirgenler, soñra üç kişilik kamerağa avuştırğanlar. Yanvarniñ 10-nda Ziyadinov ve Seydametov Yelets şeeriniñ apishanesine avuştırıldı.
2022 senesi martnıñ 15-nde Rusiye prokuraturası Emil Ziyadinov içün 17 yıl apis cezası berilmesini istedi.
2020 senesi iyülniñ 7-nde Rusiye quvetçileri yedi qırımtatarı, hususan Emil Ziyadinovnıñ Qurman rayonındaki Büyük Onlar qasabasında evini tintti. Rusiye FSBsi «Qırım sakinleri arasında terror mefküresini tarqatqan, qırımlı musulmanlarnı saflarına celp etken» «Hizb ut-Tahrir» bölügini qurğanından ve iştirak etkeninden şübheli sayılğanlar tutuldı, dep bildirdi.
Rusiye uquq qoruyıcılarınıñ areketlerini Ukrayına prezidentiniñ Qırım Muhtar Cumhuriyetindeki temsilciligi takbih etti, Qırım Muhtar Cumhuriyeti ve Aqyardaki Milliy polisniñ Baş idaresi Ukrayına Ceza kodeksiniñ 162-nci maddesiniñ 2-nci qısmına (mesken tiyilmemezliginiñ bozuluvı) ve 146-ncı maddesiniñ 2-nci qısmına (qanunsız bir şekilde azatlıqtan marum etüv) istinaden cinaiy tahqiqat başlattı.
«Memorial» aq qorçalayıcı merkezi Emil Ziyadinovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
