Advokat Emil Kurbedinov Rusiye Federatsiyası kontrolindeki İçki rayonınıñ prokuraturasına Rusiye polisiniñ hadimleri tarafından Kreml reinesi Vadim Siruknıñ ömür arqadaşı Anna Bogaçevağa qarşı yapılğan cinayet aqqında haber yolladı. Bu aqta «Qırım birdemligi» haber ete.
Aprelniñ 3-nde uquq qoruyıcılar Rusiye «arbiy mühbiri» Aleksandr Fedorçaknıñ mezarını ateşke berüv davası sebebinden Bogaçevanıñ evine keldi.
Aq qorçalayıcılar qayd etkenine köre, ziyaret vaqtında polis hadimi Bogaçeva «bir daa maşina aydamaz ve olarnıñ rayonında yaşamaz», dep qorquzdı. Polis qadınnı olarnen kelmege zorladı, amma bir vesiqa bermedi. Bogaçeva razı olmayıp, resmiy celpname alğan soñ advokatnen kelecegini ayttı. Polis hadimlerinden biri «munasebetni bozmamağa» tevsiye etti, kelecek sefer tintüv vesiqalarınen kelip, ve «daa beter olur», dep ayttı.
Kurbedinov yapqan muracaatında uquq qoruyıcılarnıñ areketlerini teşkermege talap etip, Rusiye uquq qoruyıcılarınıñ Vadim Siruknıñ ömür arqadaşınıñ evine kelmesiniñ siyasiy sebepleri bar, dep qayd etti.
«Er kes, hususan uquq qoruyıcı organlarında bile ki, Vadim ve onıñ kibi mabüsler siyasiy mabüs ola. Bu insanlar iç bir vaqıt zorbalıq, terroristik ya da ekstremist bir areket yapmadı. Amma, buña baqmadan, olarnı çeşit cedvellerge terrorist olaraq kirseteler. Ve tek bu sebepten olar ve qorantaları taqip etile», – dep izaatladı Kurbedinov.
Martnıñ 31-nde saba İçki rayonınıñ Rusiye memuriyet yolbaşçısı Anton Kravets bildirgenine köre, Qırımda İçki qasabasınıñ mezarlığında Rusiye «arbiy mühbiri» Aleksandr Fedorçak ve daa üç Rusiye arbiyiniñ mezarı yaqıldı.
Daa evel Rusiye qurğan «Krım-24» telekanalında çalışqan «İzvestiya» Rusiye neşiriniñ mühbiri Aleksandr Fedorçak Lugansk vilâyetinde elâk oldı. «ForPost» Aqyar neşiri bildirgenine köre, Fedorçak HIMARS «arbiy mühbirler» maşinasına darbe endirgende elâk oldı. O, «Zvezda» telekanalından zenaatdaşlarınen ölüm yaralarını aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
