Soñki vaqıtları Qırımda Rusiye uquq qoruyıcıları qırımtatar faali Elmaz Akimovanıñ ana-babası yaşağan evni tekrar ziyaret etti. Bu aqta o, Facebook saifesinde yazdı.
«Bugün (yanvarniñ 18-nde – QA) saat 18-lerde uquq qoruyıcı organlarınıñ hadimi kene davetsiz keldi. Bu sefer bir özü. Soñki aman-aman 3 aftada bu ekinci ziyaret oldı. Kene bir «tenbisiz», «saqındıruvsız». Ana-babasına polis kapitanı olaraq özüni tanıttı. Mennen subetleşmege keldi. Mevzu belli degil. Bir qaç kün evelsi advokat, tuvğanlarım, yaqın dostlarımnıñ tevsiyesinen Qırımnı vaqtınca terk etmege mecbur oldım. Ümüt etem ki, tezden evge, Qırımğa qaytacam», – dep aytıla haberde.
2022 senesi dekabr ayınıñ soñunda Elmaz Akimova Rusiye Ekstremizm ile küreş merkeziniñ hadimi ve yerli polis evini ziyaret ettiler, dep bildirdi. O vaqıt oña bir tenbi ya da saqındıruv berilmedi. Ziyareti nenen bağlı sualine «bazı insanlarnıñ yaşağan yerini teşkermek emri bar», dep cevap berdiler.
Rusiye uquq qoruyıcıları Elmaz Akimovanıñ evine ziyaretler aqqında bildirmey.
Daa evel Qırımda Rusiye uquq qoruyıcıları faal Elmaz Akimovanı «qanun bozulmaycaq» dep tenbiledi. Han Sarayı yanında keçirgen bir kişilik narazılığından soñ tutulğanı aqqında haber etilgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
