Rusiyede aprelniñ 1-nde başlaycaq baar askerlik kampaniyası çerçivesinde celpnameler elektron şeklinde yollanacaq. Bu aqta Rusiye Baş ştabı baş teşkiliy-seferberlik idaresiniñ yolbaşçısı kontr-admiral Vladimir Tsimlânskiy brifingde bildirdi. Haberdar etüvniñ tehnik imkânı olmasa, celpnameler berilecek, dep qoştı o.
Rusiye Baş ştabınıñ vekili aytqanına köre, askerlikke çağıruv arfesinde Rusiye Mudafaa nazirligi «vatandaşlarnı esapqa aluvnıñ ilk azırlığını» yaptı, yekâne malümat bazası şekillendirildi. 18 yaşından 27 yaşına qadar 700 biñden çoq insan cedvelge alındı.
Rusiye «Arbiy mecburiyet ve arbiy hızmet» qanunına köre, arbiy hızmetke alınacaq Rusiye vatandaşları arbiy komissarlıqnıñ celpnamelerini alıp imza qaldırmağa mecburlar. Celpnameler arbiy komissarlıq hadimleri ya da vatandaşnıñ çalışqan (oquğan) yerinde reberler, teşkilâtnıñ arbiy-esap işinden mesüliyetli kişiler tarafından berile. Celpanemelerde aytılğan talaplar yerine ketirilmese, vatandaşlar içün uquqiy aqibetler qayd etilmeli.
Aynı vaqıtta, elektron poçta vastasınen arbiy hızmetke çağırmağa izin bergen madde qanunda yoq.
Martnıñ 30-nda Rusiye prezidenti Vladimir Putin Rusiye ordusına askerlikke aluv buyruğını imzaladı. Vesiqağa köre, 147 biñ insannı orduğa alacaq olalar. Bu raqam keçken senege köre 12,5 biñ çoq ola. Askerlikke aluv aprelniñ 1-nden iyulniñ 15-ne qadar olacaq.
2022 senesi Rusiye ordusınıñ sayısı 500 biñ insanğa arttı, dep bildirdi Bloomberg agentligi. Rusiye statistikasınıñ resmiy malümatına köre, 400 biñ arbiy bar. Bloomberg talilcileri qayd etkenine köre, bu malümat tam degil. Olar qurulışlarğa alınğan ve Rusiye ordusınen alâqası olmağan tahminen 100 biñ insannı köz ögüne ala, meselâ, «ÇVK Vagner».
Rusiye akimiyeti ordu sayısını arttırmaq niyetinde. Aprelden başlap Rusiye Mudafaa nazirligi añlaşmalı olaraq arbiylerni hızmetke ala. Maqsat – daa 400 biñ insannı almaq.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
