Rusiye uquq qoruyıcıları 2023 senesi avgust ayında tutqan «qırımlı musulmanlar davasınıñ» mabüsi Eldar Yakubovnıñ apayına sekiz ay içinde ilk sefer Aqmescitteki SİZO-2-de aqayınen körüşmege izin berildi, dep haber ete «Qırım birdemligi» cemaat birleşmesi.
Bu yıl yanvar ayında Rusiyeniñ Kiyev rayon mahkemesi Eldarnıñ ömür arqadaşı Ayşe Yakubovanıñ Aqmescitteki SİZO-2-de aqayınen körüşüv yasağı şikâyetini red etken ve mahkeme vekiliniñ talaplarına riayet etmegenine dair (Rusiye Federatsiyası memuriy uquq bozuvları kodeksiniñ 17.3 maddesiniñ 2-nci qısmı) memuriy protokol tizgen edi. Ayşe Yakubovağa biñ ruble para cezası berildi.
Faallerniñ yazğanına köre, Eldar Yakubov ömür arqadaşı Ayşe Yakubovağa baş ağrısı ve başında şamata olğanını haber etti. Apishane ekimi qan basımı yüksek olğanını qayd etti – 160/110 – ve qırımlı bir buçuq afta qullanğan ilâc berdi, amma baş ağrısı keçmedi. Ayşe aqayı pek azdı, dep bildirdi.
Eldar tutuv şaraitlerini «pek sert» dep tarif ete.
«Qaidelerge riayet etmegenlerni bir kişilik kameralarğa alalar ya da «sert rejim qatına» alalar. Yatmağa izin berilmey, ayaqlarnı töşekke kötermege ve oturmağa olmay, tek kündüz yaslanmayıp oturmağa izin berile. Saba saat altıda turğuzalar, saat 22-de yatalar», – dep ayttı aqayınıñ sözlerini Ayşe Yakubova.
Bundan ğayrı, «Qırım birdemligi» yazğanına köre, Eldar Yakubovğa dava malümatı ögrenmesi içün berildi. O, 11 cılttan ibaret olğanını añladı.
Avgustnıñ 24-nde Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Avgustnıñ 25-nde Rusiye kontrolindeki Aqmescitniñ Kiyev rayon mahkemesi tutulğanlarnı eki ayğa SİZOğa yolladı. Bu qarar alınğanda mahkeme binası ögünde oturışuvğa kelgen faaller kütleviy şekilde tutuldı. Umumen 23 kişi tutuldı, dep haber etildi, olarğa Rusiye ordusında askerlik celpnameleri berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
