Rusiye kontrolindeki Kiyev rayon mahkemesi «qırımlı musulmanlar davası» mabüsiniñ ömür arqadaşı Ayşe Yakubovanıñ Aqmescit SİZO-2-de aqayınen körüşmek yasağına qarşı şikâyetini red etti ve mahkemede Eldar Yakubovnıñ fotoresimini çıqarğanı içün memuriy protokol tizdi. Bu aqta «Qırım birdemligi» cemaat birleşmesine advokat Emil Kurbedinov bildirdi.
Ayşe bıltır sentâbr ayında aqayınen qısqa körüşüvlerge izin bermegen FSB tahqiqatçısı Vitaliy Vlasovnıñ areketlerini şikâyet etken edi.
«Altı balam bar. Aqayımnen aqıl tanışacaq meselelerim bar. Yaqında anası vefat etti. Cenaze, dualarnen bağlı meseleler bar edi», – dep bildire Yakubovanıñ aytqanlarını faaller.
Berilgen malümatqa köre, oturışuvdan soñ Ayşe aqayı Eldarnıñ fotoresimini yaptı. Mahkemede olğan vekil fotoresimni silmege talap etti. O, yasaq aqqında bilmey ve onıñ yanında fotoresim sildi. Amma buña baqmadan, o, diger vekillerni çağırdı. Olar ise qırımtatarınıñ ömür arqadaşına mahkeme vekiliniñ talaplarına yerine ketirmegenine dair (Rusiye Federatsiyası Memuriy uquq bozuvları kodeksiniñ 17.3 maddesiniñ 2-nci qısmı) protokol tizdi. Ayşe Yakubovağa 3 biñ rublege qadar para cezası berile bile.
Avgustnıñ 24-nde Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Avgustnıñ 25-nde Rusiye kontrolindeki Aqmescitniñ Kiyev rayon mahkemesi tutulğanlarnı eki ayğa SİZOğa yolladı. Bu qarar alınğanda mahkeme binası ögünde oturışuvğa kelgen faaller kütleviy şekilde tutuldı. Umumen 23 kişi tutuldı, dep haber etildi, olarğa Rusiye ordusında askerlik celpnameleri berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
