Rusiye kontrolindeki Aqmescitniñ İç işler bölüginiñ nevbetçi bölügi 15 künge apiske alınğan qırımlı Eldar Odamanov vaqtınca tutuv izolâtorında buluna, dep bildirdi.
Bu aqta «Qırım birdemligi» cemaat birleşmesi advokat Lilâ Gemeciniñ malümatına esaslanıp bildirdi.
«Nevbetçi bölüknen telefonnen bağlanıp, Odamanovnıñ bulunğan yeri aqqında malümat alıp olamadım. Bu malümat telefonda berilmey, dep ayttılar. Soñra Aqmescit şeeriniñ İç işler nazirliginiñ nevbetçi bölügine bardım, nevbetçi hadim Odamanov Eldar Useinoviç tutulğan vaqtınca tutuv izolâtorınıñ nevbetçi bölüginen bağlanıp, Odamanov izolâtorda buluna, dep tasdıqladı», – dep bildirdi Gemeci.
Nevbetçi hadim Odamanov vaqtınca tutuv izolâtorından çıqarıldımı-yoqmı tasdıqlap ya da red etip olamadı.
«Odamanov qayda çıqarıldı ve kün devaında ne oldı polis hadimi cevap berip olamadı. Polisniñ nevbetçi hadimi bergen malümat doğrumı aytıp olamayım», – dep qoştı advokat.
Daa evel berilgen malümatqa köre, sentâbrniñ 3-nde tutulğan ve 15 künge apiske alınğan qırımlı Eldar Odamanovnı Aqmescitteki vaqtınca tutuv izolâtorındanbelli olmağan yerge alıp kettiler.
Sentâbrniñ 4-nde Ukraina aq qorçalayıcı teşkilâtları «Qırım platformasınıñ» iştirakçilerini ükümetler arasında Rusiyeniñ Qırımda keçirgen yañı tintüvlerini ve apiske aluvlarnı takbih etken ortaq beyanat çıqarmasına ve Qırım sakinleriniñ evlerinde keçirilgen tintüv, olarnıñ tutuluvı ve hırsızlanuvına alâqası olğan şahıslarğa qarşı sanktsiyalar kirsetmesine çağırdı.
Sentâbrniñ 9-nda Tış işler naziri Dmıtro Kuleba Ukraina tutulğan qırımtatarlarnı azat ettirmek içün «Qırım platformasındaki» ortaqlarınen işbirligi yapacaq, dep bildirdi. Onıñ qayd etkenine köre, Ukraina diger memleketlernen meselatlar keçire.
Ukraina prezidentiniñ Qırım Muhtar Cumhuriyetindeki daimiy vekiliniñ muavini, «Qırım platforması» Ofisiniñ vekili Darya Sviridova Qırım.Aqiqatqa tefsir berip, «Qırım platformasınıñ» yedi iştirakçisi Qırımdaki yañı tintüvlerni, apis cezalarını ve tutuvlarnı takbih etti, dep bildirdi. Bular – ABD, Türkiye, Letoniya, Litvaniya, Çeh Cumhuriyeti, Büyük Britaniya ve Avropa Birligi.
