Qırımda ğayıp olğan Qırımtatar Milliy Meclisiniñ sabıq azası Eldar Mensitov Aqmescitte memuriy davalar çerçivesinde tutulğanlar içün mahsus bölükte buluna, dep haber ete «Qırım birdemligi».
Advokat Safiye Şabanovanıñ aytqanına köre, Mensitova 15 künge apiske alğanlar. O, «Jeleznodorojnıy» polis bölüginde buluna ve Rusiye Federatsiyasınıñ Memuriy uquq bozuvları kodeksiniñ 19.3 maddesine istinaden (uquq qoruyıcı organlarınıñ hadimine riayet etmeme) apiske alındı.
«İyünniñ 9-nda onı yol patrul hızmet hadimleri Aqmescit çıqışında tuttı. O, evge kete edi. Maşinalarına keçmege rica etkenler, soñra mavı Folksvagen keldi, Eldarnıñ başına çuval kiydirgenler. Soñra mahsus hızmet hadimleri onı bir mağazğa alıp ketti, anda sorğuğa çekip, qanunsız usullarnı qullanğanlar. Ertesi künü onı Ekstremizm ile küreş merkeziniñ hadimlerine bergenler, soñra ise Jeleznodorojnıy rayon mahkemesine alıp ketkenler ve «polis hadiminiñ qanuniy talaplarına riayet etmeme» sebebinden 15 künge apiske alğanlar. Körüşüv vaqtında küç qullanuv izlerini kördim», – dep tarif etti advokat.
Mahkemede Mensitov qabaatını tanımadı ve polis hadimlerine riayet etti, dep bildirdi. Qadı Galina Tsıganova Mensitovnıñ aytqanlarına qulaq asmayıp, onı memuriy apis cezasına üküm etti.
İyünniñ 10-nda Elvira Mensitova aqayı hırsızlandı, dep bildirdi. Soñki sefer qorantasınen iyünniñ 8-nde, kündüz üyle vaqtında, bağlanğan edi, ve işten qaytmadı. Eldar Mensitovnıñ arabası Aqmescitteki «Krımskiy privoz» bazarında tapıldı. Mensitov alış-veriş yapıp ğayıp oldı.
2021 senesi sentâbrniñ 8-nde Mensitovnıñ evinde tintüv keçirilgen edi. Rusiye uquq qoruyıcıları Anğaradaki gaz borusında olğan patlavğa alâqası barmı teşkerildi, dep bildirgen ediler. O künü aqşamğa doğru Mensitov Aqmescitteki FSB binasından yiberildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
