Herson vilâyetinde Rusiye uquq qoruyıcıları 47 yaşında qırımlı Eldar Karamurzanı tutıp, «qırımtatar batalyonı» ile alâqaları bar olğanında qabaatladı. Bu aqta Qırımtatar resurs merkeziniñ idare yolbaşçısı Eskender Bariyev bildirdi.
«İşançımız olğan menbadan 47 yaşında Karamurza Eldar, dört balanıñ babası tutulğanını bildim. Eldar bey 2014 senesine qadar Canköyde yaşay edi. Qırım işğali başlağanınen qoranta Jıtomır şeerine ketti, bir qaç yıldan soñ ise Qırımğa yaqın, Novooleksiyıvka qasabasına köçip yerleşti», – dep qayd etti Bariyev.
Berilgen malümatqa köre,cKaramurza evinde keçirilgen tintüvden soñ tutuldı, onı Qırımnıñ «iqtisadiy qamaçavı» ile alâqaları bar olğanında qabaatladılar. İlk malümatqa köre, qırımtatarı Novotroitsk SİZOsında tutula.
«Eldar 2-nci derece saqatı (doğma damna), bir ayağına topallay. Azatlıqta olğanda ayağı qıynay edi, zor iş yapamay edi, çünki ayağı avadan pek tesirlene», – dep qoştı Bariyev.
Onıñ aytqanına köre, Rusiye akimiyeti Karamurzanıñ maşinasını aldı. Ailesi qayda ve ne alda olğanını alâ daa bilmey.
«Eldar tutulğanından bir ay keçti, amma qorantası bulunğan yerini alâ daa bilmey. Esli-başlı anası oğlunı qıdırıp, Geniçesk rayonında sahte «uquq qoruyıcı qurulışlarnı» dolanıp çıqtı, lâkin qayda olğanını, nede qabaatlanğanını ve davasınıñ qanunsız mahkemeleri ne vaqıt olacağını aytmadılar», – dep qoştı Qırımtatar resurs merkeziniñ idare yolbaşçısı.
Martnıñ ortasında Qırımtatar resurs merkezi Herson vilâyetinde Rusiye tarafından «qırımtatar batalyonında» iştirak etkeninde qabaatlanğan daa bir qırımtatarı tutuldı, dep bildirgen edi. Qayd etilgenine köre, erkek yedi aydan berli SİZOda buluna, soy-soplarına ise tutulğanını aydınlatmağa izin bermeyler.
Uquq qoruyıcılarnıñ malümatına köre, 2014 senesinden başlap «Noman Çelebicihan qırımtatar batalyonında» iştirak etüv qabaatlavı boyunca eñ az 51 insan tutuldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
