Rusiye Federatsiyası "Aluştadaki Hizb ut-Tahrir" davası boyunca mahküm etilgen qırımtatarı Eldar Kantimirovnı vatandaşlığından resmiy şekilde marum etti. Bu aqta Qırımtatar resurs merkeziniñ (QRM) meneceri Zarema Bariyeva bildirdi.
Onıñ aytqanına köre, 2014 senesi Qırım işğalindene soñ yarımada sakinleri vaziyetniñ reineleri oldı ve vesiqa almağa mecbur oldı.
"Eldar Kantimirov vatanında yaşamaq ve sürgün etilmemek içün Rusiye pasportını almağa mecbur edi", – dep qoştı aq qorçalayıcı.
Bariyevanıñ fikirince, Rusiye akimiyeti istemegen insanlarnı başqa türlü çıqarmağa çare taptı.
"Rusiyeliler qanunlarını deñiştirdi, terrorizm, devlet hainligi, çetel devletinen bağ ya da arbiy cedvelge alınmağanında qabaatlanğan insanlarnı vatandaşlığından marum ete bileler", – dep qayd etti Bariyeva.
2021 senesi arman ayınıñ 16-nda Cenübiy okrugınıñ arbiy mahkemesi "Aluştadaki Hizb ut-Tahrir gruppasınıñ" mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
Bariyevanıñ aytqanına köre, Kyiv islâm universitetiniñ mezunı, dinşınas, arapşınas ve arap tili ocası Qırımnıñ Rusiye akimiyeti tarafından "terrorist" olaraq ilân etildi, neticede Rusiyede akimiyetni zorbalıqnen zapt etmege tırışqanında da qabaatlandı.
"Apiste bulunğan vaqıt devamında qorantası Eldarnen tek eki kere Dimitrovgrad apishanesinde uzun körüşüvlerde ve Ulan-Üdedeki koloniyada üç kere körüşip oldı <…> Apis daa kimsege fayda ketirmedi, ve Eldar da istisna olmadı. Yaşı pek olmasa da, apiske alınğan soñ Parkinson hastalığınıñ birinci derecesi qayd etildi, qışta qızmağan kamerada qalğanı içün büyrek problemleri fenalaştı", – dep qayd etti QRM meneceri.
Rusiye akimiyeti bu malümatnı izaatlamadı. Qırım.Aqiqat muarririyeti cenk vaziyetinde vatandaşlıqtan marum etüv malümatını mustaqil bir şekilde teşkerip olamay.
