Rusiye Federatsiyası tarafından mahküm etilgen qırımlı Eldar Kantimirovnı Rusiye Federatsiyasınıñ Ulyanovsk vilâyeti Dimitrovgrad şeeriniñ №1 apishanesinden Burâtiya Cumhuriyetiniñ İK-8 apishanesine alıp ketkenler. Bu aqta «Qırım birdemligi» agentligine onıñ ömür arqadaşı Elvina Useinova tarif etti.
Onıñ aytqanına köre, etap bir ay devam etti, şimdi ise erkek karantinde buluna.
«Etap zor edi. [Onı] SİZOdaki kirli kameralarğa qoydılar, olarnı bir vaqıt temizlemeyler, çünki adamlar bir qaç kün, eñ çoq bir afta qalalar, soñra devam eteler», – dep qoştı Useinova.
Faaller qayd etkenine köre, Burâtiya koloniyası Kantimirov qorantasınen yaşağan Aluştadan 7 biñ kilometrde yerleşe. Tuvğanları qırımlı aqlarına riayet etilmesini talap etkeni ve mahkemede aqlarınıñ bozuluvına itiraz bildirgeni içün o qadar uzaq yerge alıp ketirildi, dep tüşüne.
«Memuriyetniñ vekilinen körüşüv arizalarım körmemezlikke uruldı. Men bu [Burâtiyağa keçüvni] siyasiy mabüs statusımnen ve öz aqlarımnı ve qanun üstünligini qorçalavda «pek çoq» faaliyetimnen bağlı olğanı aqqında öşekler eşittim», – dep yaza Kantimirov.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen «Hizb ut-Tahrir» islâm siyasiy firqasınen alâqaları bar dep qabaatladı.
2021 senesi avgustnıñ 16-nda Cenübiy okrugınıñ arbiy mahkemesi «Aluştadaki Hizb ut-Tahrir gruppasınıñ» mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
