Bu yıl aprel ayında Kâmilev ve Kantimirov ceza izolâtorına alınğanını birinci seviye mahkemesinde şikâyet etmege tırışqan ediler. Kantimirov mahkemege apishane memuriyeti oña mevsimge köre deñiştirecek urba bermedi, dep bildirdi.
Qayd etilgenine köre, Rusiye qurğan Aqmescit rayon mahkemesi qırımtatarınıñ video qaydını berüv talabını red etti ve şikâyetini qabul etmedi. «Qırım Yuqarı mahkemesi» istinaf vaqtında video qaydını talap etmege ve şaat olaraq diger qırımlı siyasiy mabüsler İzet Abdullayev, Raim Ayvazov ve Rustem Seythalilovnı çağırmağa razı olmadı. Olar Kantimirovnıñ ceza izolâtorına çıqarılğanını, «Eldarnı cezalandırğanlarını» körgen ediler ve «bunı tasdıqlamağa azır ediler», dep qoştı uquqçı Rustem Kâmilev.
«Biz [imaye] aqqımız eki mahkeme tarafından sert bir şekilde bozuldı, dep tüşünemiz. Biz mında toqtamaycaqmız. Temyiz etip, aqiqatnı talap etecekmiz», – dep qayd etti uquqçı.
O, mahkeme oturışuvı bir buçuq saat keç başladı, dep qoştı. «Kantimirovnı tapıp olamadıq. Ulyanovsk vilâyeti apishanesinde degil endi, Ulyanovsk SİZOsında eken», – dep ayttı Kâmilev.
Onıñ aytqanına köre, Kantimirovnı hastahanege alıp ketip apishanege qaytarmaq kerek ediler, amma anda endi qaytmaycaq ve onı koloniyağa yollağanlar, dep bildireler. Siyasiy mabüsniñ qıyafetleri Dimitrovgrad apishanesinde qaldı.
Eldar Kantimirovnıñ ceza izolâtorına qapatıluvı aqqında soñki sefer keçken senne aprel ayında belli oldı. Anda onı bir qaç ay tutıp, çeşit manaçıqlarnen uzatqan ediler.
Ceza izolâtorında qırımlınıñ sağlıq vaziyeti ağırlaştı. Kantimirovnıñ bel ağrıları bar. Tibbiy bölükke yazğan arizaları qabul etilmedi. Qullanğan mahsus tibbiy kilimçikni ise alğanlar, dep qayd ete «Qırım birdemligi».
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen «Hizb ut-Tahrir» islâm siyasiy firqasınen alâqaları bar dep qabaatladı.
2021 senesi avgustnıñ 16-nda Cenübiy okrugınıñ arbiy mahkemesi «Aluştadaki Hizb ut-Tahrir gruppasınıñ» mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
