«Qırımlı musulmanlar» davası boyunca 12 yılğa üküm etilgen qırımtatar siyasiy mabüsi Eldar Kantimirov fevralniñ 15-nden berli Rusiye koloniyasınıñ ceza izolâtorında tutula. Bu aqta «Qırım birdemligi» cemaat birleşmesi haber ete.
Başta onı anda 12 künge qapatqanlar, lâkin soñra bu müddetni uzatqanlar – çeşit manaçıqlarnen, dep ayta aq qorçalayıcılar. Kantimirovnıñ özü bunı Ukrayına vatandaşlığı sebebinden basqı dep adlandıra.
«Altı kişi edik kamerada, amma tek menim ve Timur Yalkabovnıñ yanına kelip, işke çıqmağa talap ettiler, red cevabını alacaqlarını bile ediler. Başta para cezası berildi ve Timurnı kartserge yollağanlar. Bir qaç künden soñ meni de kartserge yollağanlar. Soñra er seferinde, vaqıt keçkeninen, çeşit manaçıqlarnen bu müddet uzatıla», – dep aytıla apayı Elvina Useinova bergen siyasiy mabüsniñ mektübinde.
Olarnıñ fikirince, qırımtatarlarnı ceza izolâtorına qapatqan bozuvlar ise formal ola. «Dügme qapatmadı, qollarına arqağa almadı. Bir kere ştanlarımnı yuvıp, aqşam matrasnı almaq içün qalın ştan altınen çıqqanım içün ceza izolâtorında qaldırıldım», – dep qoştı Kantimirov.
Aq qorçalayıcılar yazğanına köre, ceza izolâtorınıñ şaraitleri sebebinden siyasiy mabüsniñ sağlıq problemleri peyda oldı – Kantimirovnıñ beli ağıra ve sırt siniri qısıla. Koloniyanıñ tibbiy bölügine yazğan arizalar qanaatlendirilmedi. Ağrını alğan mahsus kilimni çekip alğanlar, dep aytalar «Qırım birdemliginde».
Rusiye mahkemesi Eldar Kantimirovnı 12 yılğa, Timur Yalkabovnı 17 yılğa üküm etti. Olar Rusiyede yasaqlanğan, amma Ukrayınada ve bir çoq memlekette sıñırsız areket etken «Hizb ut-Tahrir» teşkilâtınıñ faaliyetinde iştirak etkeninde qabaatlana.
«Memorial» aq qorçalayıcı merkezi «qırımlı musulmanlar davasınıñ» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
