Çarşenbe künü, iyülniñ 29-nda, Aqmescit rayonınıñ Mamaq (Stroganovka) köyünde elâk olğan üç yaşında Musa Suleymanovnıñ evinde qırımlı siyasiy mabüsler içün dua yapıldı. Bu aqta «Qırım birdemligi» cemaat birleşmesi Facebook saifesinde bildirdi.
«İslâmğa köre, bala cenazesinden soñ dua yapılmay, çünki balalar günâhsız sayıla. Qırımnıñ çeşit köşelerinden insanlar elâk olğan balanıñ qorantasına qol tutmaq, babası ve bütün siyasiy mabüsler içün dua etmek içün keldi. Siyasiy mabüs Ruslan Suleymanovnıñ qorantası içün büyük ğayıp, 3 yaşında küçük Musanıñ vefatı bütün Qırımnı sarstı», – dep aytıla haberde.
«Memorial» halqara aq qorçalayıcı merkezi Ruslan Suleymanovnı ve daa bir qaç on qırımlı musulmannı, bunıñ kibi davalarnıñ mabüslerini siyasiy mabüs dep saya.
Ukraina jurnalistleri milliy birligi oğlu elâk olğan qırımlı cemaat jurnalisti Suleymanovğa qol tutmağa çağırğan edi.
Üç yaşında Musa Suleymanov iyülniñ 24-nde aqşam ğayıp oldı. Qırımnıñ bütün köşelerinden onı qıdırmaq içün bir qaç biñ insan keldi. İyülniñ 26-nda Qırımdaki Rusiye Fevqulâde vaziyetler idaresi bildirdi ki, balanıñ cesedi çuqurda tapıldı. Onı iyülniñ 27-nde defin etkenler.
Bundan evel Qırım ve Aqyardaki Rusiye Tahqiqat komitetiniñ idaresi oğlançıqnıñ coyuluvınen bağlı cinaiy dava açtı, Qırımnıñ Rusiye prokuraturası ise Rusiye Ceza kodeksiniñ 105-inci maddesiniñ 2-nci qısmındaki «v» noqtasına istinaden – küçük balanıñ öldürilüvi – cinaiy dava açtı.
Qırımtatar Milliy Meclisiniñ reisi Refat Çubarov Musa Suleymanovnıñ ölüm sebeplerini bilmek içün yardım etmege azır olğanını bildirdi.
