«Agora» halqara aq qorçalayıcı gruppasınıñ advokatı Aleksey Ladin Qırımnıñ Aqmescit rayon mahkemesine Tahqiqat komitetiniñ tahqiqatçıları Timofey Piven ve Dmitriy Kosâkinniñ areketsizliginen bağlı şikâyet arizasını berdi. Advokatnıñ fikirince, olar İsmail Ramazanovğa qarşı davanı toqtatmaq muracaatınıñ baqılmasını soza. Bu aqta advokat Qırım.Aqiqat mühbirine ayttı.
«Bizler 7 künden berli Ramazanovnıñ cinaiy işini toqtatmaq muracaatınen bağlı qarar çıqarmağan tahqiqat areketsizligine dair şikâyet arizasını mahkemede qayd ettik», – dep bildirdi Ladin.
Advokatnıñ şikâyet arizasında qayd etkenine köre, tahqiqatçı Kosâkin telefonda iş ziyaretinde olğanını bildirip, Ramazanovnıñ davası tahqiqatçı Pivenge berildi, dedi. Lâkin ne Ramazanov, ne imayecisi bundann yazma şekilde haberdar etilmegen edi.
«Tahqiqatçı Piven Ramazanovğa telefonda bildirgenine köre, bu muracaatnen bağlı qararnı çıqarmaq içün 10 künü bar, faqat angi qanunğa esaslanğanı belli degil. Mence, mında tahqiqatçınıñ areketsizligi bar», – dep qayd ete şikâyet arizasında Ladin.
Haber derc etilgende tahqiqatçılarnıñ bir de bir izaatı yoq edi.
Daa evel haber etilgeni kibi, advokat Qırımdaki Rusiye Tahqiqat komitetine muracaat yollap, Rusiye Ceza kodeksiniñ 282-nci maddesine istinaden Zello internet ratsiyası üzerinden nefret ve duşmanlıq doğurğanında qabaatlanğan İsmail Ramazanovğa qarşı cinaiy davanı toqtatmağa rica etti.
İsmail Ramazanov 2018 senesi yanvarniñ 23-nde tutulğan edi, Novıy mir köyündeki evinde tintüv keçirilgen edi. Rusiye Tahqiqat komiteti, onı Zello internet-radiosı vastasınen ekstremizm teşviqatında qabaatladı.
İyülniñ 14-nde İsmail Ramazanov SİZOdan çıqtı, çünki bu cinaiy iş boyunca şeklengenler yarım yıldan ziyade nezaret altında qalmay.
Avgustnıñ 2-nde belli oldı ki, Ramazanovğa qarşı cinaiy iş qoşma tahqiqatqa qaytarıldı.
