Qırımlılar Ekrem Kroş ve Leman Zekerâyev mahkeme oturışuvında Aqmescitteki SİZO-2-de işkencege oğradılar, dep bildirgenler. Bu aqta «Suspilne» «Qırım birdemligi» cemaat birleşmesine esaslanıp bildire.
Kroş aytqanına köre, oña qarşı elektroşoker qullanıldı, qol ve ayaqlarnen köteklendi.
«Üç saat devamında baş üstüne köterilgen qollarnen oturdı. Maneviy basqı da yapıldı, oña çeşit küfürler aytıldı. Zekerâyev Leman da küç qullanılğanını, köteklengenini, aqaretlengenini ve maneviy basqığa oğrağanını tasdıqladı», – dep tarif etti uquqçı Lilâ Gemeci.
Bundan ğayrı, «Gratı» neşiri Kroşnıñ Qırım tahqiqat izolâtorında işkencege oğrağanını derc etti.
2023 senesi yanvarniñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.
Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.
Qırımnıñ Rusiye yolbaşçısı Sergey Aksenov yanvarniñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
