Ekinci Canköy "Hizb ut-Tahrir davası"nıñ mabüsleri Qırımdan Rostov-na-Donudaki 1-nci nomeralı SİZO-ğa etiap etilgen. Bunı "Qırım birdemligi" cemaat birdeşmesi haber etti.
Söz Osman Abdurazakov, Löman Zekeryayev, Halil Mambetov, Refat Seydametov, Ekrem Kroş ve Ayder Asanov aqqındadır.
"Balalar pek kiçik olğanı içün sabadan aqşamğace yolda, naqliyatta olmaq pek qıyın ve men öyle de onen körüşip olamadım. Endi biri-birimizni ne vaqıt, qaysı şaraitte körecegimiz bir Allahqa belli", - dep ayta Abdurazakovnıñ apayı Zera.
Refat Seydmametovnıñ apayı Leniye de aqayını ne vaqıt köre bileceginiñ belli olmağanını ayttı. 68 yaşındaki Halil Mabetovnıñ qızı Elmaz babası artroz hastalığını çekkenini, anası ise bir qay yıldan berdi onkologiyadan tedaviylev körgenini qayd etti.
Zera Zekeryayeva aqayınen körüşip olğan. Tevqif etilmezden evel Löman qart anasını baqa ve üç kiçik balasını terbiyeley edi.
Yanvarniñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.
Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.
Qırımnıñ Rusiye yolbaşçısı Sergey Aksenov yanvarniñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
