Rusiye kontrolindeki Aqmescitniñ Kiyev rayon mahkemesi «ekinci Hizb ut-Tahrir Canköy gruppasınıñ» davası boyunca tutulğan qırımtatarlarnıñ apsini uzattı. Osman Abdurazakov, Ekrem Kroş, Halil Mambetov ve Refat Seydametov sentâbrniñ 23-ne qadar SİZOda qalacaqlar, dep haber ete «Qırım birdemligi».
Gruppanıñ altıncı iştirakçisi – Ayder Asanovnıñ – davasını ayrı mahkeme oturışuvında baqacaqlar.
Aq qorçalayıcılar yazğanına köre, tahqiqatçı daa yımşaq bir ceza saylansa, olar «saqlana ya da şaatlarğa basqı yapa bile».
«Tahqiqat tarafı müvekkilim Osman Abdurazakovnıñ saqlanmaq niyeti olğanını isbatlağan bir delil köstermedi. Tahqiqatnıñ tek tahminleri bar. Gizli şaatlarğa basqı yapmaq niyeti ve imkânları yoq. Olarnı tanımay bile», – dep qayd etti advokat Emine Avamileva.
Advokat Siyar Panik mahkemede 68 yaşında Halil Mambetovnı qorudı. O, SİZOda hastalığı – yürek yetmesizligi – daa beter oldı, dep ayttı.
«Fonografik ekspertiza Mambetovnıñ «cinayeti» eki sözden ibaret lafı ola, dep kösterdi. 2015 senesi oldı. O vaqıttan berli sekiz yıl keçti, bu vaqıt devamında insan yürdi, kimsege yaramay bir şey yapmadı», – dedi advokat.
Advokat Aleksandr Stasük bildirgenine köre, Kiyev rayon mahkemesiniñ qararı üç kün içinde şikâyet etilecek. O, siyasiy mabüs Ekrem Kroşnıñ menfaatlarını temsil ete.
Yanvarniñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.
Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.
Qırımnıñ Rusiye yolbaşçısı Sergey Aksenov yanvarniñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
