Noyabr 11-inde Rostov-na-Donu şeeriniñ SİZOsında bulunğan ekinci Bağçasaray "Hizb ut-Tahrir davası"nıñ iştirakçisi Seyran Saliyevni kartserge oturttılar. Bunı advokatı Emil Kurtbedinov haber etti ve müşterisi kartserde beş kün devamında tutulacağını qoştı.
Seyran Saliyevniñ qadını Mümine Saliyeva, Qırım.Aqiqatqa tefsir bererek, aqayını saat içün kartserge oturtqanları aqqında aytıp berdi.
"SİZO kameralarında sıq-sıq tintüvler yapıla. Tintüvlerniñ birisinde aqayımda saat taptılar. O, saat, namaznı vaqtında qılmaq içün kerek, dep añlattı. Añlağanıma köre, qaravullar, saatnı qaytaracaqlar, dep ayttılar, amma qaytarmadılar. Aqayım, buña narazılıq kösterip, sayuv vaqtında kamerağa kirmekni red etti. Bunıñ içün onı kartserge oturttılar", - aytıp berdi Mümine.
O qoştı ki, noyabr 15-inde Rostov-na-Donu mahkemesi, ekinci Bağçasaray "Hizb ut-Tahrir davası"nı baqıp başlaycaq.
Mümine Saliyeva, Seyrannıñ anası onen körüşmege istegenini ayttı, amma kartserde bulunğance, körüşüvler ve yollanmalar yasaqtır.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
