Ekinci Bağçasaray "Hizb ut-Tahrir davası" iştirakçilerine tuvğanlarınen körüşmege razı oldılar. Hususan, Server Mustafayev, Ernes Ametov, Server Zekiryayev ve Timur İbragimovnıñ soyları körüşüv iznini aldı, dep bildire Qırım.Aqiqat mühbiri.
"Bugün oğlum Server Mustafayevnen körüşip oldım, mennen onıñ apayı Mayye de bardı. Bilem, Ametov, Zekiryayev ve Timur İbragimovnıñ soylarınıñ da körüşmege çareleri oldı. Körüşüv eki saatqa yaqın edi, Servernen camdan laf ete edik. Men, qırq daqqağa yaqın laf ettim, soñ daa bir saatqa yaqın Maye qonuştı. Serverniñ alı bir qarar. Oña ilâc yollacaq edik, amma şimdi bir şeyge ihtiyacı yoq, dep ayttı. Daa üç adam ilâc kerekmey, dep ayttı, tek, bilgenime köre, Timur İbragimovnıñ sağlıq problemaları bar ve anası yaqın vaqıtta ilâc yollamağa tırışacaq. Server mahkeme aqqında da ayttı, balalarnıñ ruh alı küçlüdir ve olar artqa çekilmege niyetleri yoq, dep qoştı", - aytıp berdi Server Mustafayevniñ babası Rustem Mustafayev.
«Qırım birdemligi» eñ küçükler içün (süret toplamı)
Noyabr 15-inde Rostov-na-Donu şeeri Cenübiy okrugınıñ arbiy mahkemesi, ekinci Bağçasaray "Hizb ut-Tahrir davası"nı baqıp başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.