Ekinci Aqmescit "Hizb ut-Tahrir davası"nıñ mabüsi Іzzet Abdullayev Rusiye Federatsiyasınıñ Ulânovsk vilâyetindeki Dimitrovgraddaki apishanege etap etilgen. Bunı "Qırım birdemligi" cemaat birleşmesi haber etti.
"Etap aqqında aqayımdan bildik, o ketmezden evel özü bizge haber etti. Novoçerkask SİZO-sından iyülniñ 2-nde alıp ketkenler, iyülniñ 3-nde o endi Vladimirde edi. İyülniñ 15-nde Ulânovsk vilâyetindeki Dimitrovgradğa kelip çıqqan. Kelgeninen andaki urbanı bergenler ve karantinge yollağanlar. Apishanedeki şarait aqqında daa bir şey yazmadı", - dep aytıp berdi apayı Gkzel Abdullayeva.
Mayısnıñ 12-nde Rostov-na-Donudaki Cenübiy bölgesiniñ arbiy mahkemesi ekinci Aqmescit "Hizb ut-Tahrir davası"nıñ mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa üküm çıqardı. Olar 12 ile 14 yıl apis cezalarsına mahküm etildiler. İzzet Abdullayev ilk 5 yılını apishanede keçirecek 12 yıl sert rejimli koloniyada qalmasına ve azat etilgen soñ 1 yıl azatlığı sıñırlanacaq, dep üküm çıqarıldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
