«Avropa birdemliginiñ» Ukraina halq deputatı İrına Ğeraşçenkonıñ bildirgenine köre, Kremlniñ eski siyasiy mabüsi, qırımlı Volodımır Baluhnıñ ekimleriniñ aytqanına köre, onıñ alı stabil, tedaviylevinde müsbet deñişmeler bar.
«V.Baluhnıñ ekimlerinden: «Hasta stabil, belli bir müsbet deñişmeler yoq! Bugün kontrol tomografiya yapıldı – yaradan qalğanlar qayd etile, beklenmegen bir şey ve fenalaşuv yoq. Tedaviylev devam ete», – dep yazdı Ğeraşçenko Facebook saifesinde.
İrına Ğeraşçenkonıñ ekimlerniñ malümatına esaslanıp bildirgenine köre, tezden Baluhnı ilâc komasından çıqarmağa tırışacaqlar.
Cumaertesi künü, sentâbrniñ 19-nda, N4 Kyiv prokuraturasınıñ prokurorınıñ muracaatı esasında paytahtnıñ Dnepr rayon mahkemesi Baluhqa ağır yara ketirgeninden şübheli sayılğan kişini eki ayğa apiske aldı.
Ukraina milliy politsiyası sentâbrniñ 18-nde Baluhnı köteklegeninden şübheli sayılğanını yaqaladı.
Daa evel «Avropa birdemliginiñ» Ukraina halq deputatı İrına Ğeraşçenkonıñ bildirgenine köre, Volodımır Baluhnıñ alı aqqında ekimlernen qoşma mesleatlar keçirildi. Oña ameliyat yapıldı ve reanimatsiyağa alğanlar. Daa soñra Baluh aqcigerlerni suniy avalandıruv cihazına bağlandı. Onıñ ağır qafa-miy yarası bar.
Baluh köteklengenini Oleg Sentsov haber etti. Onıñ malümatına köre, faal sentâbrniñ 7-nden 8-ne keçer gecesi köteklendi. Ağır alda hastahanege alındı – qolu ve köpürçik kemigi sındırıldı.
Kiyv politsiyasınıñ malümatına köre, qırımlı 10-15 kişinen «Gidroparktaki» qavelerden birinde raatlanğan edi. Soñki sefer onı yarı gecede körgenler. Uquq qoruyıcılar Ukraina Ceza kodeksiniñ 187-inci maddesiniñ 4-ünci qısmına istinaden (aydutlıq) cinaiy tahqiqat başlattı.
Ukraina prezidentiniñ ofisi qırımlığa yapılğan ücüm sebebinden qasevetlengenini bildirdi.
