Eki uçucısız dekabrniñ 5-nde saba Kefedeki cermay bazasına ücüm etti, dep haber ete Rusiye ve Qırım Telegram kanalları.
«Baza» Telegram kanalı malümatına esaslanıp yazğanına köre, «Morskoy Neftânoy terminal» Rusiye cermay bazasına eki uçucısız ücüm etti. Berilgen malümatqa köre, bir uçucısız avada detonatsiya olğan eken – cermay bazasına parçaları tüşti, ekincisi rezervuarlardan birinden 70 metr mesafede tüşti.
Gece «Krımskiy veter» Telegram kanalı Kefedeki cermay bazasından ZPRK «Pantsir-S1» ateş açtı, dep bildirdi.
Cermay bazasında zararlar ya da yanğın aqqında haber etilmey. Rusiye akimiyeti bu malümatnı izaatlamadı.
Qırım ve Rusiye Telegram kanalları dekabrniñ 5-nde gece Keriç, Kefe ve Eski Qırımda patlavlar eşitildi, dep bildirdi. «Krımskiy veter» Telegram kanalı Keriçte on beşten çoq patlav aqqında bildirdi. Rusiye akimiyeti bildirgenine köre, Keriç (Qırım) köprü dört saattan çoq qapalı edi. Rusiye Telegram kanalları Kefede ve civarında küçlü patlavlar aqqında yazdı.
Rusiye Mudafaa nazirligi ise Qırım uçucısızlarnıñ ücümine oğradı, dep bildirdi. Müessiseniñ ilk malümatına köre, 22 dron Qırımda ve Azaq deñizinde tüşürildi, daa 13 danesi tutuldı. Rusiye arbiy müessisesi ekinci haber paylaştı, Azaq deñizinde urıp tüşürilgen dört ve tutulğan eki uçucısız aqqında bildirildi.
Rusiye arbiyleri Ukrayınanı ücümde qabaatlay, Kyiv bu malümatnı daa izaatlamadı.
Cenk vaziyetinde Rusiye Mudafaa nazirliginiñ beyanatını tasdıqlamaq imkânsız ola.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
