Rusiye uquq qoruyıcıları sentâbrniñ 26-nda Yalta rayonınıñ Qızılaş (Krasnokamenka) köyünde tutqan qırımtatarlar Arsen Cepparov ve Emil Nazarbekov yiberildi. Bu aqta «Qırım birdemliginiñ» mühbiri bildirdi, dep haber ete «Suspilne».
Qırımtatarlar Aqmescitteki «Ekstremizm ile küreş merkezinde» sorğuğa çekildi. Sentâbrniñ 27-ne keçer gecesi Arsen Cepparov ve Emil Nazarbekov evge qaytqanlar.
Tünevin Rusiye uquq qoruyıcıları siyasiy mabüs Refat Alimovnıñ qız qardaşınıñ aqayı Emil Nazarbekovnı ve bu yıl baarde yedi yıldan soñ koloniyadan çıqqan Arsen Cepparovnı belli olmağan yerge alıp ketti.
«Hizb ut-Tahrir davası» boyunca mahküm etilgen Arsen Cepparov 2023 senesi aprelniñ 17-nde azatlıqqa çıqtı. Onı 2016 senesi aprelniñ 18-nde tutqan ediler. «Qırım birdemligi» qayd etkenine köre, apiske almazdan bir ay evelsi FSB hadimleri iş yerine kelip, onı işbirligine iqna etecek oldı. Cepparov dige insanlar aqqında malümat bermek kerek edi. Razı olmasa, oña qarşı cinaiy dava açılacaq, dep aytıldı.
Cepparov razı olmadı ve işten çıqarıldı. 2016 senesi aprelniñ 18-nde Aluşta rayonınıñ Qızıltaş (Krasnokamenka) köyündeki evinde tintüv keçirildi. Cepparovnıñ davası daa evel tutulğan Refat Alimov, Müslim Aliyev, Enver Bekirov ve Vadim Siruknıñ davasına ilâve etildi. Aq qorçalayıcılar onı «Hizb ut-Tahrir» davasınıñ «Yalta gruppası» dep adlandırğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
